النهارده، 27 يناير، يوم تقدير الـ "Bubble Wrap". أو كيس الفقاقيع زي ما بنسميها. طبعًا هو مصدر سعادة مش مفهوم، بمجرد ما العين تقع عليه. وعلشان كده في يوم تقديره الخاص، هنقول لكم على 5 فوايد ليه:

1- غلاف قوي لأي منتج

علشان كده أي حاجة جديدة بتتلف جواه. دايًما بيحمي المنتجات من الصدمات أو السقوط. خاصة لو حاجت بيتم نقلها لمسافات بعيدة.

2- استخدامات كتيرة

الكيس ده مش بس بيحمي المنتجات، انت ممكن تستخدمه في حاجات تانية في البيت. زي مفرش على مكتب أو ترابيزة، يحميها من الخدوش. أو ممكن تغطي بيه حاجة انت شايلها في الدولاب أو المخزن. أو أي افتكاسة ممكن تخطر على بالك. 

3- وزن خفيف

كيس الفقاقيع ده من أخف مواد التغليف. هو أصلًا عبارة عن شوية بلاستيك مليانين هوا. وده يخليه اختيارك الأول لتغليف أي منتج، مهما كان حجمه. زائد إنه بيوفر مستوى حماية عالي بتكلفة أقل. يعني صفقة كسبانة 100%.

4- قابل للاستخدام أكتر من مرة

مكمل معاك ومالوش تاريخ صلاحية. طول ما الفقاقيع مليانة هوا، تقدر تستخدمه تاني وتالت ورابع. وده كمان يخليه صديق للبيئة أكتر من أي منتج، بيُستخدم مرة واحدة ويترمي.

5- مريح للأعصاب

ودي أهم حاجة طبعًا. ماتنكرش إنك بترتاح نفسيًا أول ما تمسك الكيس، وتفضل تفرقع فيه لحد ما يخلص. بعدها بتحس إن التوتر راح وأعصابك هديت كتير. الفرقعة دي بتغسلك من جوة.