الصورة الرئيسية من صفحة: Mgpexel
ساعات من كتر حبنا لنجومنا الكبار، بنتمى لو يفضلوا معانا العمر كله، وفراقهم بيطفى جزء كبير من روحنا وذكريتنا، وده اللي كلنا حسينا بعد خبر وفاة الكوميديان الكبير سمير غانم، ما إحنا فتحنا عنينا على صوت "فطوطة" وشقاوته وكبرنا على إفيهات "المتزوجون" وغيرها وغيرها، علشان كده "سمورة" حالة مابتتكررش، تركيبة خاصة من الكوميديا مش ممكن ييجي زيها تاني، يالا نعرف ليه؟.
1- بيفكرنا برمضان وذكرياته
مين ينسى "فطوطة" وفوازير زمان، صوته وستايله وتفاصيل تانية كتير وقتها كانت اختراع. وناس كتير حبيتها. سمير غانم قدر يحفر اسمه في دولاب ذكريات رمضان اللي كلنا بنحن لها ونفسنا نعيشها تاني.
2- فنان متنوع
سمير غانم مش بس مثل سينما ومسرح وتليفزيون، ده كمان قدم استعراضات ماتتنسيش. من أشهرها استعراض أغنية "شوفت الحليوة راكبة تاكسي" من فيلم "30 يوم في السجن"، مع جورج سيدهم والضيف أحمد.
3- له استايل مميز
الباروكة والنضارة والخواتم، وطبعًا هدومه الشيك اللي معظمها باللون الأسود. استايل كده بإكسسواراته بيميز سمير غانم بس. تحس ماينفعش حد غيره يلبسها. تركيبة كده تخص الكوميديان العبقري ده لوحده.
4- حاجة من ريحة الزمن الجميل
سمورة بدأ مشوراه الفني في الستينات، يعني عاصر عمالقة ونجوم زمن الفن المصري الجميل. علشان كده هو من القليلين اللي طلتهم على الشاشة، بتحسسك بفرحة ماتقدرش تفهم معناها. حاجة كده بتجمع حلاوة دلوقتي وزمان.
5- أكتر واحد ضحَكنا في دور الست
ضحكنا كتير مع فنانين قدموا دور الست في أعمالهم، لكن كل ده كوم وأداء سمورة كوم تاني خالص. الدور اللي عمله في مسرحية "أخويا هايص وأنا لايص" قدر يضحكنا من قلبنا لحد النهارده في كل مرة بنتفرج عليه.
6- ظهوره كضيف شرف بيميز أي عمل
نجوميته الكبيرة وتألقه اللي ميختلفش عليه اتنين، بيميزوا أي عمل يظهر فيه كضيف شرف. ويكون العمل ناجح كده كده علشان واخد توقيع "سمورة".
وعلشان مصر دايمًا ولادة بنتمنى نشوف سمير غانم جديد.. هتوحشنا يا أحلى سمورة
