في ظل أزمة انتشار فيروس كورونا، كتير من أصحاب العمالة اليومية خسروا شغلهم. وبقوا في أشد احتياج للمساعدة. والأمر زاد صعوبة بقرب رمضان، وزيادة احتياج الأسر للمواد الغذائية.
علشان كده المؤسسات الخيرية بدأت تكثف جهودها، لمساعدة المحتاجين في كل مكان. وأكيد الخير مش هيكمل غير بمساعدتنا كلنا. إحنا هنقول لكم على دور أهم الجمعيات الخيرية في الأزمة، وإزاي تقدروا من خلالها تساعدوا الأسر المحتاجة:
جمعية رسالة
رسالة بدأت مبادرة "تحدي الخير" لمساعدة وكفالة 100 ألف أسرة، من اللي فقدوا عملهم بسبب الحظر. المبادرة مستمرة وتقدروا تساهموا فيها من خلال الموقع الإلكتروني أو الرسايل، وطرق تانية مختلفة. اعرفوا كل تفاصيل المشاركة من صفحتهم على فيسبوك.
جمعية الأورمان
علشان تساعد الأسر الفقيرة في كل محافظات مصر، جمعية الأورمان عملت كراتين مواد غذائية وطبية مختلفة. وتقدروا تشاركوا بأسهم بتبدأ من 250 جنيه، لحد 1000 جنيه. طرق التبرع وأرقام التليفونات كلها موجودة على صفحتهم على فيسبوك.
بنك الطعام المصري
بنك الطعام المصري مهتم بدعم العمالة اليومية، علشان كده بدأ حملة توزيع 500 ألف كرتونة إطعام. ومكمل لحد رمضان. سعر الكرتونة 80 و 160 جنيه. علشان تعرفوا طرق التبرع كلها، ادخلوا على صفحتهم على فيسبوك.
مؤسسة مصر الخير
مصر الخير عملت كرتونة مواد غذائية وشنطة حماية طبية، للأسر المستحقة. بسعر 200 جنيه. تفاصيل المشاركة والتبرع كلها على صفحتهم على فيسبوك.