أيام قليلة وهتنطلق الدورة الثانية من مهرجان "Insomnia Egypt"، أكبر تجمع سنوي للجيمرز ومحترفي للألعاب الإلكترونية في الشرق الأوسط. المهرجان هيكون يوم 31 أكتوبر لحد يوم 2 نوفمبر 2019. والفعاليات هتكون في مركز مصر للمعارض الدولية والمؤتمرات، في التجمع الخامس.

بيعتمد المهرجان على تجميع الجيمرز والشركات الرائدة في مجال الألعاب، من كل حته في العالم. كمان بيوفر لكل عشاق الألعاب الإلكترونية وقت لطيف وممتع، خصوصًا إن في تنوع كبير  في الألعاب، اللي بتناسب كل الأعمار والأذواق. المهرجان يعتبر فرصة عظيمة للشباب المطورين، اللي بيبتكروا ألعاب إلكترونية وحابين يسوقوها. كمان بيوفر مساحة لشركات الألعاب إنها تسوق منتجاتها الترفيهية ويشوفها الجمهور المناسب.

ألعاب تنكرية، مسابقات، جوائز عالمية، معارض أفلام وغيرهم، كل ده وأكتر في مكان واحد. يعني لو انت جيمر حريف متفوتش الفرصة دي، واستعد لأكبر تجمع ألعاب سنوي في مصر. اللطيف كمان إنك ممكن تروح مع أصحابك أو أهلك، والكل هيلاقي ألعاب على ذوقه وينبسط.

السنة اللي فاتت المهرجان جمع عدد كبير من الجيمرز في دورته الأولى، ومتوقع السنة يكون على نفس المستوى. وده لإنه يعتبر النسخة العربية من مهرجان  إنسومنيا البريطاني، اللي اتنظم قبل كده 60 مرة. يعني هتلعب وتنبسط.

علشان تعرف تفاصيل أكتر عن المهرجان وتلحق تحجز تذكرتك ادخل هنا.