في الوقت اللي ناس كتير واخدة موقف من أحمد فهمي، بسبب ردوده على السوشيال ميديا، بنلاقي أخوه الفنان كريم فهمي في حتة تانية خالص. فيه حاجت كتيرة بتميزه وبتخلي البنات كمان تحبه. الحقيقة كريم فهمي من أول ظهوره وهو فارس أحلام بنات كتير، حتى بعد ما اتجوز وخلف برضو بنات كتير بتكراش عليه. تعالوا نعرف السبب:

دقنه حلوة 

البنات بتضعف قدام الراجل اللي بدقن، وبصراحة كريم في الدقن يجنن. وسيم وطول بعرض والدقن لايقه عليه أوي، مخلياه كارف علي برازيلي شوية.

خلوق ومحترم

كل الفنانين بيتعرضوا لمواقف محرجة من جمهورهم، سواء في الواقع أو على السوشيال ميديا. عمرنا ما سمعنا عن موقف وحش بينه وبين حد من جمهوره. ده ظهر مؤخرًا في فرح أخوه أحمد، لما واحدة علقت على شكل بناته بأسلوب مش كويس. وكان رده في قمة الاحترام.

بيحب في مراته قدام الناس عادي

كريم واضح من كلامه على مراته في البرامج وصورهم سوا إنه بيعشقها. في فرح أحمد قلب الدنيا والبنات كانت هتتجنن عليه، لما شافوا نظراته ليها وغناه ورقصه معاها. مع إن ده المفروض العادي بس ساعات مابيحصلش.

;

أب مثالي

مهتم ببناته بزيادة. وقال قبل كده إنه بيغير على بنته من الناس، رغم إنها لسه بيبي. شكله كده هيبقى زي عادل إمام في فيلم "عريس من جهة أمنية" لما يكبروا. يمكن علشان كده دايمًا بيخبي وشهم عن الناس. والأحلى كمان إن بياخدهم معاه الجيم.

دكتور أسنان

مش بس ممثل وكاتب وأسمراني، لا كمان درس طب أسنان. بس حبه للفن والكتابة شده أكتر، واختار إنه يبقى الكارير بتاعه. يعني مفيش حاجه بعده كده، كامل من مجاميعه الصراحة.