نتفق أو نختلف معاهم، منقدرش ننكر إنهم مميزين وبنحبهم، عندهم فلسفة خاصة في الحياة، بتعتمد غالبًا على اللامبالاة والجرأة والتجاهل، ودول 3 صفات بنحتاجهم علشان نزق الدنيا، ما هو إحنا أهلينا معلموناش ببلاش علشان نحرق أعصابنا ببلاش كده.

يالا ندردش شوية عن كل واحد فيهم:

محيي إسماعيل 

أغرب ردود ممكن تسمعها في حياتك، هتطلع منه هو بس، جرئ وواضح لدرجة مضحكة، بالمناسبة هو دراس كلامه كويس ومش بيقوله علشان الاهتمام، خالص يا جماعة هو كده من زمان.

محمود حميدة 

حكيم الفنانين، كل كلمة بيقولها ليها بعد ومعنى مش أي كلام هو، نقدر نجمعهم في ليست كده ونسميها: "على رأي محمود حميدة"، عارف أولها وآخرها ما هو فنان تقيل برده، وعلشان نديله حقه عنده حتة مبهجة لذيذة بتظهر أحيانًا.

عمرو عبد الجليل 

برنس التوهان واللخبطة، عمرو عبّد الجليل مستحيل تلاقيه رد على سؤال أتوجهله في لقاء أو على الريد كاربت بشكل مباشر زي باقي الفنانين عادي، هيلف وبدور بطريقته المعروفة، ومش هتوصل معاه لحاجة، ده ساعات بيوجه هو السؤال للمراسلين! والريد كاربت بتتحول لفقرة كوميدية.