"صوت مصر" اسم شركة إنتاج أنغام اللي أنتجت ألبومها الجديد، خطوة جديدة عليها، لكن لحد دلوقتي نقدر نقول إنها كسبت الرهان، وبعيد عن الألقاب، خلونا ندردش معاكم ونعرف سوا الألبوم مكسر الدنيا كده ليه؟ مع إنه معداش عليه يومين.
1- أفكار الأغاني جديدة علينا
يبان إن الألبوم حزايني، لكن الحقيقة هو حزين بشكل مختلف، يعني زي ما بتقترح عليه يسيبوا بعض في "تيجي نسيب"، هتلاقيها كمان بتهدده بالانتقام منه في "موافقة" وهاتسيبوا عادي بعدها، مش بس كده، هتلاحظ كمان إنها أخيرًا اتعلمت وبقت تعرف تختار صح، وفي نفس الوقت بتستنى حبيبها المختفي أصلًا بالسنين.
2- أغانيه وصلتلنا بسرعة
أوقات بنحتاج نسمع أغنية معينة مرة واتنين وتلاتة، عشان نوصل لقلب معناها، بس في الألبوم ده الأغاني هجمت علينا بلا رحمة، تسمع أغنية من هنا تفتكر موقف هناك، وهات يا تقليب في رصة الذكريات للصبح.
3- مشاركة أكرم حسني مفاجأة حلوة
كتب أغنيتين"تيجي نسيب" و"خليك معاها" نقدر نقول إنهم "هيد" الألبوم لحد دلوقتي ، حلوين بشكل يخليك تجيب كرسي وتقعد في البلكونة بالليل تفكر مع نفسك إزاي أكرم حسني اللي بيموتنا من الضحك الكوميديان ده، يطلع منه كل الدراما دي، لا بجد إزاي؟
4- ميكس حزين وحنين على الهادي
علشان نكون منصفين أنغام روقت على الحبيبة بأغنيتين "هو أنت مين" و"القلوب أسرار " رايقين وإحساسهم حلو، صحيح كان نفسنا تهتم بالأغاني الرومانسية والفرفشة أكتر، بس منقدرش نقول حاجة دي أنغام يا جماعة وتعمل اللي هي عيزاه.
5- أنغام كانت وحشانا
سميعة أنغام عارفين إن آخر ألبوم نزلته باللهجة المصرية كان "حالة خاصة" سنة 2019، صحيح نزلت بعدها أغاني "سينجل" كتير، بس فكرة إن يكون عندك مخزون أغاني جديدة بصوت مطربك المفضل غير يا جماعة.
ملحوظة: حبايبنا اللي معندهمش تجارب لعينة مع الحب بننصحهم بلاش "تيجي نسيب"، شكرًا.