اتعودنا نشوف العجب في "جوي أووردز ــ Joy Awards"، نجم من الشرق بيسلم عالمي من الغرب جائزة، فنان اختفى تلاقيه فجأة قدامك، من الآخر كل أحلامنا وتخيلاتنا في عالم الفن بقى سهل تتحقق؛ وبما إن إمبارح كان حفل جوي أووردز في دورته الخامسة بالرياض، تعالوا نشوف إيه أكتر لقطات جذبت الناس واتكلموا عليها.
هانز زيمر انحنى لعمر خيرت
من ضمن اللقطات العالمية والتاريخية اللي كانت في الحفل، إننا شوفنا اتنين من عملاقة الموسيقى في العالم في صورة واحدة، والأجمل إن الموسيقار الكبير عمر خيرت سلم الموسيقار الألماني هانز زيمر جائزة الإنجاز مدى الحياة، والأخير انحنى لتحيته.
دعم شيكو لهشام ماجد
كاميرا حفلة "جوي أووردز" لقطت شيكو بيصور صديقه هشام ماجد، خلال تسليمه جائزة أفضل ممثل في فئة السينما، علشان تبقى ذكرى حلوة يحتفظ بيها على موبايله، والأحلى إنهم مثال حقيقي لعلاقة صداقة سوية متصدرة السوشيال ميديا مؤخرًا.
فستان نادية الجندي
الفنانة نادية تصدرت الجندي تريند مواقع التواصل الاجتماعي، بسبب فستانها في حفل "جوي أووردز"، واللي اختلفت الآراء عليه، والبعض شاف إنه أوفر شوية ومش مناسبة للفنانة.
تجميعة أحمد رزق وأحمد عيد وفتحي عبد الوهاب
بطريقة مش مترتبة، طل علينا الثلاثي أحمد رزق وأحمد عيد وفتحي عبد الوهاب في صورة من كواليس الحفل، الصورة دي رجعت الناس 25 سنة لوراء، وافتكروهم في "فيلم ثقافي".
نظرة أحمد عز للممثلة التركية توبا بويوكوستن
الكاميرا تاني جابت لقطة قلبت السوشيال ميديا، وهنا بنشوف الممثلة التركية توبا بويوكوستن لتقول كلمة للحاضرين، فـ بيتفاعل معاها أحمد عز وبيبان على وشه تعبيرات التشجيع والفرحة، لكن الجمهور كان له رأي تاني!
استعراض تامر حسني ونيللي كريم
كعادته قدر تامر حسني يخطف عيون الحاضرين، ودخل المسرح طائر في الجو على نغمات أغنيته الشهيرة "بنت الإيه" وشاركته الغناء، نيللي كريم اللي ظهرت وكأنها أميرة من زمن الأساطير.
مقلب رامز جلال
لو مكانش رامز جلال يعمل مقلب في الكل مين اللي هيعمله، تنكر رامز في هيئة مطرب هندي كبير، وكمان غنى هندي وخلع الماسك وهو بيقول: "لا تقولي ميل جيبسون ولا هاريسون فورد .. رامز نجم الجوي أووردز".
