من الواضح أن قصة انفصال أحمد السقا عن زوجته الإعلامية مها الصغير، توابعها مكملة معانا شوية، خاصة مع انتشار الشائعات وبوستات السقا.

وأخر التطورات اللي حصلت، هي السقا أرسل تسجيل صوتي للكاتب الصحفي أشرف شرف رد فيه على تساؤلات كتير وقال: "أنا مش فاضي أرد على تلميحات ولا بوستات، أنا مشغول بالسفر، رايح الإمارات والسعودية علشان الحج، وقبلهم كنت في فرنسا، مها أم ولادي، ولو احتاجتني في أي حاجة، هكون أول واحد جنبها".

وقال كمان: "أنا عمري ما أذيت حد في حياتي، وفضلت محافظ على علاقتنا لآخر لحظة. لو عايزة تتجوز، تتجوز، ده حلال ربنا، أنا راجل متربي على الأصول، ومش هتكلم في تفاصيل، بس عملت اللي عليا وزيادة، مستحيل أشوف حد من أهلي بيتوجع وأسكت، ربنا يسعد الكل، وأنا مكمل ردي في شغلي".

وكان انتشر على فيسبوك منشور منسوب للفنان أحمد السقا، بعد شائعات ارتباط طليقته مها الصغير بالفنان طارق صبري، المنشور قال: "باي باي يا أكبر كدبة في حياتي، واحذريني عشان نفد صبري وهابقى دمي تقيل ورب السماء والطارق".

البوست ده اتفهم على إنه تلميح مباشر لطارق صبري، خاصة مع استخدام كلمات زي "صبري" و"الطارق"، لكن بعد شوية، البوست اتشال من الحساب، وده خلى الناس تتساءل عن مصداقيته.

في نفس الوقت، في مصادر قالت إن السقا مش هو اللي كتب البوست، وإن شقيقته هي اللي كانت بتدير الحساب ونشرته من غير علمه.

كمان، السقا نشر على انستجرام ستوري قال فيها: "معنديش مانع تعمل عليا لقطة، بس المهم تستحمل مني باقي الفيلم"، وده زود الجدل أكتر.

في المقابل، مها الصغير نفت الشائعات دي، وكتبت على فيسبوك: "واتقوا يومًا تُرجَعون فيه إلى الله، حسبنا الله فيمن قال فينا ما ليس فينا".