هاجمت أسرة الفنان الراحل عبد الحليم حافظ إدارة مهرجان موازين بالمغرب، بعد ما استخدمت هولوجرام للعندليب من غير ما ترجع للورثة أو تاخد إذن مكتوب منهم.

الأسرة نشرت على الصفحة الرسمية لعبد الحليم بيان قالت فيه: "مهزلة وفضيحة كبرى في حفل موازين النهاردة. ماكفهمش يطلعوا حليم بهولوجرام بشكل كارتوني مضحك، لأ وكمان مطلعينه بنص جسم بس! كل اللي حضروا الحفلة بيقولوا إنها مهزلة بكل المقاييس".

وقالوا كمان: "حذرناكم من الأول وقلنا لكم إن المهرجان بيتعاون مع شركة إحنا رفضنا نتعاقد معاها بسبب خيبة تقيلة حصلت سنة 2021، وأديكم فضحتوا نفسكم. دي سقطة كبيرة للمهرجان وهنكسب القضية إن شاء الله، ونشوف ساعتها رئيس المهرجان هيكمل ولا هيتشال".

وأكدوا إنهم هيتخذوا كل الإجراءات القانونية ضد المهرجان وأي جهة تحاول تستغل اسم وصوت وصورة عبد الحليم من غير تصريح رسمي، وختمت كلامها بإن اللي حصل ده إساءة كبيرة لعبد الحليم ولكل رموز الفن، وإن تراثه أمانة مش هيسيبوه لحد يتلاعب بيه.