النهارده 12 أغسطس، اليوم العالمي للشباب، وبما إننا مهتمين أكتر بالفن ونجومه، فا قولنا ندردش معاكم عن شباب الفن اللي قدروا يلمعوا ويخطفوا الأضواء خلال الفترة الأخيرة.
ويجز
عدد جمهور حفلات ويجز أو أحمد علي، بيعدي الـ 30 ألف شخص، وده رقم مش قليل أبدًا في سوق الحفلات في مصر، ولو هنصنفه إنه رابر، فا نقدر نقول لحد النهارده ويجز التوب على شباب الراب سين.
طه دسوقي
أدائه في اختيارته الأخيرة، بيقول إنه مش بس هيبقى كوميديان جامد، لا ده إحنا عندنا جيل فنانين شباب متمكن، منين ما تكون الشخصية، هيعرف يمسك خيوطها، طه في 3 حاجات بتميزه "تلقائي- شبه شباب كتير- أدائه طبيعي مش فيك).
عصام عُمر
ربنا إداله نعمة القبول كممثل ناس كتير تتمنى ربعها، طاقة تفاؤل وراحة تحسها وأنت بتتفرج على عصام، تخليك ماتشبعش منه، وكمان عنده تلقائية وبساطة غابت شوية عن الفنانين مؤخرًا.
نور النبوي
شعبية نور بين الشباب الصغير خطيرة، من الآخر هو محطوط في قالب الكراش، وده ماخلاهوش يعتمد على كاريزمته ويأنتخ، لكن قدر كمان يخلع من فكرة أصله ابن فنان وبيمثل بالواسطة، اتفرج على نور في مسلسل "إمبراطورية ميم" أو فيلم "الحريفة"، هتعرف قصدنا.
أسماء جلال
منورة وسط بنات جيلها، طول الوقت هتلاقي السوشيال ميديا بتتكلم عنها، وحاضرة على الساحة، أسماء كمان من الفنانات اللي روحها حلوة، ودي ميزة هتساعدها كتير في مشوارها.
