انهارت أنغام بالبكاء في مداخلة هاتفية مع الإعلامية لميس الحديدي في برنامج "كلمة أخيرة" على قناة ON، بعد الهجوم الكبير اللي اتعرضت له على السوشيال ميديا، واتهامها إنها السبب في الحملة ضد شيرين عبدالوهاب بعد أزمتها في مهرجان موازين بالمغرب.

وقالت أنغام وهي بتعيط: "أنا مالي؟! أنا تعبانة ومكنتش قادرة أقوم من السرير، وفجأة لاقيت نفسي بتشتم وأهلي بيتشتموا!"، وأضافت إنها كانت بتمر بوعكة صحية ودخلت المستشفى فعلاً، ووقتها لقت الناس بتقارن بينها وبين شيرين وبيوجهوا ليها اتهامات مالهاش أي أساس من الصحة، وقالت: "كفاية كره وحقد.. أنا بقيت بتأذي من الكلام".

مش بس كده، أنغام خرجت عن صمتها وقالت: "تحملت 4 سنين من التلميحات، حتى منها شخصيًا، ومع ذلك ماردتش ولا مرة، كنت بزعل بيني وبين نفسي وبعذرها، لكن نوصل لمرحلة توجيه الناس ضدي؟! تطلعوني كأني بتآمر وأقود حملات ضد زميلة؟! ده ظلم وحرام وعيب".

ووضحت إنها مش بتتهم شيرين شخصيًا، لكن في ناس حواليها هما اللي بيقولوا كده وبيوجهوا الناس على نفس الموجة، وحذرت أنغام أي شخص يتمادى ويجيب سيرتها، وقالت إنها بالفعل رفعت قضية على شاب كتب على تويتر: "مش هترحمي شيرين يا أنغام" وكسبت القضية، والشاب اتحبس فعلًا.

من ناحيتها، حاولت لميس الحديدي تهديها وقالت: "اللي بيحصل مش عدل.. مش طبيعي إن واحدة مريضة تتهاجم بالشكل ده".

ولو عايزين تعرفوا أكتر عن أزمة شيرين في موازين، شوفوا الموضوع ده:  

شيرين عبدالوهاب تغني بلاي باك في موازين.. والجمهور يعترض!