في واقعة غريبة حصلت النهاردة، أحمد أبو زهرة، نجل الفنان الكبير عبد الرحمن أبو زهرة، أعلن إن هيئة المعاشات أوقفت صرف المعاش الشهري لوالده، بعد ما وصلهم إخطار من الأحوال المدنية بوفاته.

أحمد قال إنهم اكتشفوا الموضوع لما المعاش ما وصلش في ميعاده، ولما راحوا يستفسروا، قالولهم إن الأحوال المدنية بلغتهم بوفاة والده.

ولما حاولوا يوضحوا إن ده خطأ، طلبوا منهم يا إما الفنان يروح بنفسه، يا إما يبعتوا مندوب يتأكد إنه لسه عايش.

بس الأسرة رفضت الخيارين، لأن حالة الفنان الصحية ما تسمحش، وكمان حفاظًا على خصوصيته.

الدكتور أشرف زكي، نقيب المهن التمثيلية، تدخل في الموضوع، وتواصل مع مسؤولي التأمينات، واللي بدورهم اعتذروا عن سوء التفاهم اللي حصل.

وبالفعل الهيئة القومية للتأمين الاجتماعي طلعت بيان قالت فيه إن اللي حصل كان نتيجة "مشكلة تقنية محدودة"، وتم تداركها فورًا، ورجعوا يصرفوا المعاش.

وفي لفته لطيفة، رئيس الهيئة، اللواء جمال عوض، وجه بتقديم بوكيه ورد واعتذار رسمي للفنان تقديرًا لمكانته الفنية والإنسانية.