المطرة كانت قوية جدًا اليومين اللي فاتوا. وشوفنا الويل في الطرق والزحمة والمواصلات. وتقريبًا أغلب المصالح اتعطلت. وعلى جنب كده بنلاقي الناس بتتقسم في موضوع المطرة ده. مش كله بيحبها ولا بيكرهها، بيبقوا فرق كده ومجموعات مختلفة. فتعالوا نتعرف على أنواع الناس في المطر:

المكتئب

عفريت الاكتئاب بيلبسه أول ما يشوف المطر. يتقفل كده ويتقوقع في نفسه، لا عايز يكلم مع حد ولا عايز يعمل حاجة.

الفرحان

ده عكس اللي فوق بالمللي. أول ما يعرف الخبر بس، تلاقيه بيتنطط ويتشقلب ويقلبها مهرجانات. وأكيد المشي تحت المطر ده أول الخطط اللي بيتم تنفيذها.

المأنتخ

أول ما المطرة تهل، يكنسل كل المشاوير. ويرمي نفسه في أحضان الكنبة قدام التليفزيون. ده بيتلكك علشان يأنتخ في البيت، وبصراحة الأنتخة حلوة.

مراسل السوشيال ميديا

طبعًا ده ماسك موبايله ومقضيها فيديوها واستوريز وصور. مكرس نفسه لمتابعة آخر أخبار الأمطار لحظة بلحظة. وهتعرف منه المطرة كتيرة فين وقليلة فين، وكل التفاصيل والمستجدات.

عدو الحكومة

أول ما الدنيا تخرب ده اللي هيبدأ يناشد المسؤولين، بضرورة إيجاد الحلول. ويشدد ويشجب وينتقد الإهمال والتسيب. طبعًا ده كلام مظبوط، بس كل مرة الدنيا بتخرب عادي مع المطر.

قنبلة الكوميكس

سايب الكل يضرب يقلب ومقضيها شير للكوميكس بتاعت المطر. ده اللي هينسيك أي حاجة بتعملها ويخليك تفطس من الضحك. ماهي بصراحة الكوميكس والفيديوهات اللي بتطلع من الموضوع ده بتكون رهيبة.

يا ترى بقى انت مين في دول؟؟