بلاد كتير في العالم، بتحتفل النهارده 31 أكتوبر بعيد "الهالوين" أو عيد الهلع، وكل سنة بيلبسوا ملابس تنكرية لشخصيات خيالية مرعبة، وبعيد بقى عن نحت ثمرة "قرع العسل"، وتوزيع الحلويات على الأطفال وكل الطقوس المرحة دي، ماتنساش إننا بنعيش لحظات مرعبة كل شهر، ماتفرقش كتير عن قصص الرعب وطرد الأرواح الشريرة.
1 – لما تكون طول الشهر، كل شوية تطلع النتيجة وتقعد تعد فاضل كام يوم والمرتب وينزل، ولما توصل لليوم ده، تلاقي محاسب الشركة بيقولك "المرتب هيتأخر شوية" ومش عارفين هينزل إمتى كمان.
2 - أخيرًا المرتب نزل ورايح تسحبه عادي من الـ ATM ، فـ الكارد بتاعك يتسحب شوية ومايخرجش من المكينة. (فبتترعب وبتجيب ناس تترعب معاك).
3 - لما تكون مفلس، وخطيبتك أو مراتك تقولك اليوم ده مش بيفكرك بحاجة؟ ولا لما تتفتح الفيسبوك ومارك يفكرك بأعياد ميلاد كل اللي بتحبهم فجأة. (مؤامرة كونية مافيش كلام).
4 - لما تقبض آخر الشهر، وتسحب فلوسك كلها وتحطها في المحفظة، وتروح البيت فرحان، وتيجي تخرج محفظتك من جيبك تلاقيها مش موجودة! اتسرقت يا معلم!
5 – "عفوًا لقد نفذ رصيدك".." لقد استهلكت 100% من باقتك الشهرية"، مافيش أكتر من كده رعب لما توصلك الرسائل دي وأنت عارف إن المرتب هيتأخر، يعني لا نت ولا مكالمات ولا فلوس.
6 - لما تصرف يمين وشمال، ما هو تعبك وشقاك برضه، وهوب هوب تكتشف إنك صرفت مرتبك كله في أول أسبوع.
7 – لما تعزم حبيبتك على أكلة حلوة في مطعم رومانسي، وتطلب الشيك في الآخر فتكتشف إن المطلوب ضعف الفلوس اللي متبقية من مرتبك!
كل عيد رعب وأنتم مطمنين
