من زمان وبلدنا عمرانة بالسياح من كل مكان في العالم، شتاء أو صيف، الفسحة فيها تعلي الكيف، خلطة مبهرة ما بين الحضارة القديمة والتطور، وكأنك لفيت عبر الأزمنة، وبما إننا دلوقتي في الصيف، حبينا ندردش معاكم في 5 أسباب بتعيشهم مصر اليومين دول تبسط أي حد جواها أو بيفكر يزورها.

1- حفلات في كل مكان

من القاهرة للإسكندرية، سهرات الطرب والمغنى تقريبًا شبه يومية، سواء كانت في قلب القاهرة زي اللي حاصل دلوقتي في القلعة، أو حفلات الساحل اللي بتضم نجومنا اللي بنحبهم.

اعرفوا تفاصيل أكتر عن الحفلات من هنا.

2- أفلام جديدة

السينما المصرية بتعيش موسم صيف ساخن جدًا، بدءًا من عيد الأضحى اللي فات، ومكمل الفترة الجاية بدفعة أفلام جديدة منها الكوميدي والاجتماعي والرومانسي، لنجوم الصف الأول، هتخلي خروجة الصيف ماتتنسيش.

3- شواطئها مناسبة للكل

مصر بتطل على بحرين الأبيض والأحمر، وده بيسمح لك بتجربة شاطئية خطيرة، لو بتحب الأجواء العائلية والأسعار المعقولة اطلع على الإسكندرية، ولو حابب الحفلات والجنان أكتر عندك الساحل، أما بقى لو عايز تمتع عينك وتفصل خالص مش هتلاقي أجمل من دهب ومرسى مطروح والغردقة وشرم الشيخ.

4- القاهرة وجمالها

مش شرط تسافر علشان تتبسط، القاهرة مليانة حاجات وأماكن ممكن تعملها، "كافيهات، مطاعم، مولات"، وعلشان تظبط خروجة على مزاجك، هتلاقي هنا على كايرو 360، أجمل الترشيحات والأماكن المتجربة.

5- مهرجانات غنائية وفنية

العلمين الجديدة والساحل الشمالي، بيستضيفوا مهرجانات غنائية، وفي انتظار مهرجانات سينمائية وريد كاربت خلال الشهور الجاية، يعني لو مهتم بالفن عمومًا، تقدر تحضر مهرجان الجونة أو القاهرة وغيرهم كمان.

صيفكم منعش وسعيد