بعد بدايته على موقع يوتيوب، قدر الفنان إبراهيم السمان مقدم برنامج المقالب الشهير "كريزي تاكسي"، يجذب عدد كبير من عشاق التليفزيون في رمضان لبرنامجه، والسنة دي قرر ياخدنا معاه في رحلة كوميدية جديدة مع ناس عادية من الشارع.

دردشنا في "كلام القاهرة" مع صاحب التاكسي المجنون، وعرفنا إنه في الموسم الثالث من البرنامج وعلى مدار 30 حلقة، هنشوف شخصيات كوميدية مختلفة، منها اللي قابلهم في الحقيقة واللي من خياله.

قال كمان إنه اتعرض لمواقف صعبة كتير خلال التصوير، زي إن الناس بعد المقلب مابتصدقش إنه مقلب أصلًا وبتفضل تضرب فيه برضه، وأكد إنه عمره ما اتفق مع حد علشان يصور معاه مقلب، ودي كلها شائعات هتفضل تتقال على أي برنامج بيقدم النوع ده من المقالب.

وأكد إنه من أشد المتابعين للفنان رامز جلال، وإنه من أشطر الفنانين اللي قدموا برامج مقالب في مصر وماحدش يقدر ينافسه فيها.

وكان من المقرر مشاركته في أكتر من مسلسل رمضاني زي "بابلو وتوبة"، لكنه اعتذر لانشغاله بتصوير برنامجه، وبيحضر دلوقتي لفيلم سينمائي جديد اسمه "المخ في التلاجة".

برنامج "كريزي تاكسي" هيتعرض على قناة القاهرة والناس.