اتعودنا من تامر حسني على المفاجآت في أعماله، والمرة دي المفاجأة خضت ناس كتير، لما ظهر في إعلان جديد لصالح واحدة من شركات الاتصالات، بشخصيات مطربين مفيش بينه وبينهم أي شبه لا في الشكل ولا الصوت، لو لسه ماشوفتش الإعلان هنقولك فكرة عنه.
في أول الإعلان تقريبًا كده، الفنان "الطيب" بهاء سلطان بلغة الشباب "عض" تامر، فا ظهر بنفس تسريحة شعره وكمان عرف يجيب نفس طبقه صوته! ومعلومة كده عالماشي، دي مش أول مرة تامر حسني يقلد بهاء، لإنه غنى بداله في دويتو "راجعلي ليه"، اللي كان المفروض كل واحد فيهم هيغني جزء منه، بس تامر غنى الغنوة كلها لوحده، حسب تصريحات تامر مع منى الشاذلي.
نيجي بقى للصورة اللي قلبت السوشيال ميديا، وهي ظهور تامر بـ لينسز خضراء ومن غير دقن، وهنا كان بيقلد النجم الإسكندراني مصطفى قمر، والحقيقة إحنا اتخضينا من صوته، تامر ظهر في فيديو قبل كده مع مصظفى قمر وطلب منه يقلده، وفعلًا غناله أغنية "أمانة ياليل"، وكان هايل، تقدروا تشوفوها من هنا.
بعد كده هتشوف لذاذة مش عادية، الفنان تامر عبد الباسط حسني حمودة على الشاشة ياخبر! من وجهنا نظرنا الفنان الشعبي عبد الباسط حمودة كان أكبر تحدي لتامر في الإعلان، بس للأمانة ماسبش تفصيله، من أول قصة شعره لحد طبقة صوته المميزة.
وفي آخر الإعلان بيظهر بشخصية الرابر مروان موسى بس مش بيراب، لكن بيقلد طريقته وحركاته في الكلام.
