مؤخرًا، ومع ظهور الفنان بهاء سلطان في لقاءات تليفزيونية، الناس بدأت تلاحظ في شخصيته "الطيبة" والتواضع الشديد، والحقيقة مفيش خلاف على الصفات دي، ولكن، أحيانًا أو ممكن نقول في معظم الوقت، "بهاء" من فرط الطيبة الموضوع بيقلب معاه بخجل وربكة، وده ظهر في حفلته الأخيرة بـ "تيرو نايت الرياض"، علشان كده حابين نوجه 5 رسائل للفنان الجميل بهاء سلطان، نوصله منها أد إيه هو فنان مهم وكبير.

1-مشوارك استثنائي "اختياراتك هايلة"

بدايتك كانت قوية، وطول فترة غناك، معظم الأغاني كانت بتفرقع، وده يرجع لاختيارك السليم لأغانيك، حتى سنين غيابك عننا، عمرنا ما نسيناك أو نسينا أغانيك.

2-أغانيك بتسد وقت الزنقة "كل الألوان بتليق عليك"

نقول كمان إن كتير مننا، استخدم كلمات أغاني بهاء سلطان في مواقف مختلفة في حياتنا، يعني مثلًا جملة "قوم أقف وأنت بتكلمني" من أغنية "قوم أقف"، حسستنا كتير بالعظمة وإننا ناس فخمة وكده، كمان "الواد قلبه بيوجعه"، بنقولها برضه لما تطلب معانا حب وحنان.

3-معظم النجوم بتحبك "وإحنا كمان"

مش بس صوتك يدخل القلب، حضورك وطلتك، والجميل إن فترة احتكارك عمرك ما قولت كلمة تجرح الطرف التاني، وسامحته وكمان غنيتله "لا العشرة لحظة هانت ولا أنت تهون".

4-مصري أصيل "شبه كتير مننا"

ملامحه مصرية ونبرة صوته فيها طعم الشارع المصري، صحيح شعره طويل حبتين، وكلنا مصممين نعرف الروتين هير الخاص بيه، ولسه مقالناش، بس مستنين برضه.

5-تقليدك علامة نجاحك و"صورة هنيدي تشهد"

الفنان محمد هنيدي ركب وجهه بالفوتو شوب على بوستر أغنية "دلوقتي عجبناكوا" لبهاء سلطان، الصورة كانت تريند على السوشيال ميديا، بالذات لما حب هنيدي يهزر مع بهاء وقاله متقلدنيش تاني، فكان رد بهاء عليه "يشرفني أقلدك يا نجم".

في النهاية حابين نقولك حقيقي أنت نجم استثنائي وتستحق كل التقدير والحب.