دخلت سلسلة محلات بـ لبن في صراع مع شركة العبد للاستثمار والتصنيع وتجارة الحلوى، بسبب إعلان من عرضته بـ بلن عن كحك العيد فيه تلميحات مش لطيفة عن حلواني العبد. حسب بيانها

اللي حصل إن بـ لبن قرروا يعملوا كحك وبسكويت العيد السنة دي، فـ عملوا إعلان مكون من مشاهد مختلفة بيشكر فيها أشخاص تطورا الكحك وخلوه مرتبط بعيد الفطر، وكان من ضمن اللقطات دي، لقطة لرجل بيقول "والله عيب عليكوا ده العيد لله هو اللي عمل الكحك تريند ولا نسيتوا".

الرجل ده والمشهد ده بالتحديد فجر الأزمة، لأن هيئته بملابسه وستايله تشبه مؤسس الشركة الراحل أحمد عبدالرحيم العبد، أحد رواد صناعة الحلويات في مصر، وبناء عليه قررت شركة العبد مقاضاة بـ لبن.

وقدمت العبد شكوى رسمية للمجلس الأعلى لتنظيم الإعلام، طالبت خلالها بوقف إعلان سلسلة بـ لبن واعتبرته مسئ لأحد رموز الصناعة المصرية.

وفي نفس السياق، كتير من المهتمين بالماركتينج، كان عندهم وجهة نظر في تصرف العبد، واقترحوا إنه كان ممكن يستغل الموقف بإنه يعمل إعلان يرد فيه بمنتاجته المعروفة بجودتها.