بيتعرض محمد رمضان حاليًا، لموجة انتقاد قوية بسبب ملابسه اللي ظهر من ساعات قليلة، خلال مشاركته في مهرجان كوتشيلا الموسيقي بالولايات المتحدة الأمريكية، كـ أول مصري يغني في مهرجان كوتشيلا، ورفع علم مصر هناك وغنى أغنية بعنوان "بتحلوي".

رمضان كان لابس توب لونه ذهبي بيظهر جزء كبير من جسمه، معجبتش عدد كبير جدًا من متابعيه على السوشيال ميديا، ووجهوله رسائل نقد مختلفة، وكمان نصحوه بضرورة تغيير الشخص اللي بيختار له ملابسه أو "الستايلست".

دي مش أول مرة، محمد رمضان يثير الجدل بسبب اللي لابسه، وفي سنة 2020 الفنان هاني شاكر كان نقيب الموسيقيين وقتها، خلى محمد رمضان يكتب إقرار على نفسه بالالتزام بالقواعد العامة والملابس العامة، بس رمضان ما التزمش، فـ قرر النقيب منعه من الغناء.

ليه بعض الفنانين بيصمموا يلبسوا لبس غريب؟

كتير من الفنانين بنشوفهم في المهرجانات والمناسبات لابسين لبس ملفت أو غريب، وده ساعات بيعرضهم لهجوم وانتقادات على السوشيال ميديا.

بس الحقيقة إن فيه سبب ورا الإصرار ده، مش صدفة ولا تجاهل، بالعكس، اللبس ده بيكون وسيلة لجذب الانتباه، وبيخلي الفنان يبقى محور كلام الناس والمواقع، سواء بالإعجاب أو حتى بالهجوم.

وده نفس اللي بيعمله مصممين الأزياء في عروض الموضة، لما بيقدموا تصاميم غريبة مش علشان الناس تلبسها، لكن علشان يوضحوا من خلالها ستايل الماركة ويشدوا بيها الصحافة.