أعلنت المخرجة هالة خليل من أيام قليلة، خلال ندوة تكريمها في "مهرجان أسوان الدولي لأفلام المرأة" عن بدء التحضير للجزء الثاني من فيلم "أحلى الأوقات"، اللي تم عرضه سنة 2005، وقام ببطولته حنان ترك، منة شلبي وهند صبري. فتعالوا نعرف كواليس أكتر عن الفيلم من بعض صناعه.

إيه اللي حصل بين منة شلبي وهند صبري؟

في واحد من لقاءاتها كشفت منه شلبي عن سر الخلاف اللي كان بينها وبين بنت جيلها هند صبري وقالت: "كل واحدة فينا كتفها كان عالي على الثانية وكان في وسطنا ست البنات حنان ترك، بس كنا في بينا ود كبير، وحنان ترك كانت هي همزة الوصل بينا، وده بسبب ناس كانوا بينقلوا كلام لينا عن بعض، بس لتصالحنا بعدين في فيلم "بنات وسط البلد".

هند صبري ومشهد الكشري

ذكرى لطيفة قالتها هند صبري عن فيلم "أحلى الأوقات" خلال حوار تليفزيوني، فقالت: "في فيلم أحلى الأوقات كان فيه مشهد مع حنان ترك ومنه شلبي في محل كشري، فأنا خليتهم يكرروا المشهد 17 مرة عشان أضرب 17 طبق كشري، الكشري نقطة ضعفي، ولادي برضوا بيموتوا فيه، وكل أسبوع لازم فيه يوم كشري".

"كنت بكره الفيلم ده جدًا ولسه بكرهه، لأن مكنش عندي ثقة في نجاحه، ومش عارفة ليه الجمهور أتعلق بيه للدرجادي، يمكن بسبب الفطرة والعفوية اللي فيه، لكن وأنا بقدمه ماكنتش أعرف هل هو فيلم كويس ولا لأ"، ده كلام مخرجة الفيلم هالة خليل عنه بعد نجاحه.