إمبارح، كان أحمد السقا وباسم سمرة أول ضيوف رامز جلال في برنامجه "رامز جاب من الأخر"، الحلقة تصدرت تريند السوشيال ميديا لأكتر من سبب، منهم تصريحات باسم سمرة عن نيللي كريم وزوجها اللاعب هشام عاشور.

خلال الحلقة رامز سأل باسم عن تصريحاتها المثيرة للجدل اللي قالها قبل كده عن الفنانين، ومنها إنه هو اللي علم نيللي كريم التمثيل، ولما واجهوا رامز بالتصريح ده قال: "أنا ونيللي كنا هنشتغل مع بعض، بس اتجوزت وجابت جوزها يمثل مكاني، جوزها بتاع اسكواش بس كان عايز يمثل فخدته مكاني في العمل ده".

وحسب موقع "ET بالعربي"، رد هشام عاشور على باسم سمرة في تصريح خاص وقال: "ده راجل طيب أنا مبزعلش منه لكنه بيقول أي كلام لأنه إتزنق في السؤال راح مخبط، هو فين الدور ده أنا مباخدش دور تاني أو تالت أنا باخد دور سابع ففين الدور ده؟، والوقت اللي باسم سمرة بيتكلم عليه ده أنا مكونتش لسه أعرف نيللي كريم أنا كنت عايش ومقيم في أمريكا وقتها".