علشان توصل لمحطة السلام النفسي، محتاج تفضي دماغك وترتبها، وتختار بعناية شديدة مين وإيه يستحق يشغلها، علشان كده قولنا ندرنش معاكم في 7 حاجات هتساعدنا نوصل لأروق مكان في دماغنا.

يالا نعرفهم:

1- ابعد عن السلبيين

لو بتصدق في علم الطاقة، فا أنت أكيد عارف إن كل حد فينا له طاقة معينة، واللي عايزين نقولهولك، إن الحياة مبتخلاش من بعض الأشخاص الشكايين وأعداء أي حاجة حلوة، من حقك جدَا تحمي نفسك منهم، مهما كانت درجة قربهم ليك، لإنهم هيسحبوا منك أي طاقة إيجابية وتفاؤل.

2- متشغلش بالك بحد

مش المقصود إنك ما تهتمش باللي حواليك، لكن ماتضيعش وقتك وتفكيرك، في تفسير تصرفات غيرك، ومين عمل إيه وليه؟ علشان متزحمش دماغك بمواقف وأفكار، مش قصتك خالص.

3- متقارنش خطواتك بخطوات غيرك

 المقارنة لو مكانتش هتزوقك لخطوات قدام، يبقى بلاش، لإنها هحسسك طول الوفت إن في حاجة ناقصة، وبالتالي ممكن تدخل في دايرة عدم الرضا والقبول بالمحطة اللي أنت فيها دلوقتي، الأفضل تقارن نفسك بنفسك زمان.

4- ماتدخلش معارك تافهة

 متسحلش نفسك في جدال مالوش لازمة، اللي قال إن كلمة حاضر بتريح ماكذبش، ده وفر علينا لحظات فرهدة فارغة، فا لو قفشت نفسك مسحول في حوار من إياهم، فرمل وأنزل يا معلم.

5- اعمل اللي على كيفيك

أنت مش مضطر، تبرر أو تثبت أي حاجة لأي حد، طالما مبتأذيش غيرك ومكسرتش عليه، أنت كده في الأمان، اعمل بقى اللي يحلالك، وجرب كل اللي نفسك فيه من قلبك.

6- متهتمش برأي المحبطين فيك

في رحلة الوصول للسلام النفسي، هتقابل أشخاص دايمًا شايفينك غلط، جايز لإنك سابقهم أو لإن عندهم نقص ما، دول مش محتاجينهم خالص نزلهم في أقرب محطة، وكمل في طريقك عادي، حاوط نفسك بالطيبين وبس.

7- اقعد مع نفسك

البعد عن كل حاجة مش انطواء ولا انعزال، لكن بالعكس، لما تدي نفسك شوية وقت، أنت هنا ومن غير قصد، بتتعرف أكتر على نفسك وبتراجع تصرفاتك، فا بتشحن روحك، وبترجع فاهم وواعي أكتر.