مرة جديدة بواقعة جديدة، اتسبب عامل النظافة صاحب واقعة "كشري التحرير"، في جدل واسع على السوشيال ميديا، بعد ما تردد طرده للمرة الثانية، من لوكيشن فيلم "التاروت" خلال التصوير، إمبارح، السبت، بمنطقة شبرامنت.

اللي حصل، إن الفنان محمد عز أحد أبطال الفيلم، قال إنه خلال احتفال فريق العمل، بعيد ميلاد الفنانة مي سليم، لاحظ وجود صاحب "واقعة الكشري"، بين الفنانات سمية الخشاب ورانيا يوسف، فسأله تعرف حد هنا؟ ولما قاله لأ، طلب منه الانتظار في مكان استقبال الضيوف، لكن ماطردهوش، زي ما بيتقال.

وخلف الكواليس، يقال إن  محمد عامل النظافة، كان موجود في مكان التصوير، علشان اختباره في التمثيل، وبعدها يشارك في أغنية مع عصام شعبان عبد الرحيم، ضمن أحداث الفيلم، لكن لسه ماتمش الاستقرار على مشاركته.

شايفين قصة صاحب واقعة كشري التحرير تستحق الضجة اللي حاصلة بجد؟