العيد دايمًا ليه طقوسه الخاصة، لكن بين جيل زمان وجيل دلوقتي، حاجات كتير اتغيرت، في المقال ده، هنقارن بين عادات العيد زمان والعيد في الوقت الحالي، وهنشوف إيه اللي اختفى وإيه اللي لسه مكمل معانا.
1- العيدية.. من الفلوس الورق للفلوس الرقمية!
زمان: كان الأطفال بيستنوا العيدية من الكبار بلهفة، العيدية كان ليها طعم تاني، والفلوس الجديدة كان بهجة لوحدها.
دلوقتي: بقى فيه تحويلات إلكترونية، وبدل ما تمسك فلوس في إيدك، تلاقي إشعار "تم التحويل"!
2- العيد الصبح.. صلاة ومراجيح ولا نوم؟
زمان: صلاة العيد كانت تجمع كبير، وبعدها تبدأ الخروجات والفسح والملاهي، العادات دي مكملة معانا طبعًا.
دلوقتي: ناس كتير بتصحى متأخر، والباقي بيكتفي بصور للعيد في البيت مع الكحك كوباية الشاي بلبن!
3- لبس العيد.. تفصيل عند الخياط ولا أونلاين؟
زمان: كان الأطفال بينزلوا مع أهلهم يشتروا لبس العيد من المحلات، وزمان أوي بقى كانوا بيروحوا للخياط قبلها بفترة عشان يكون اللبس جاهز.
دلوقتي: الناس بقت بتطلب لبسها أونلاين، ولو محظوظ يوصله قبل العيد بيوم!
4- الزيارات العائلية.. دقوا الباب ولا واتساب؟
زمان: زيارة العيلة كانت أساسية، والناس كانت بتروح لبعض فجأة بدون مواعيد.
دلوقتي: مكالمة فيديو أو رسالة واتساب بقت تكفي وتغني عن المشوار!
5- خروجات العيد.. ملاهي ومراجيح ولا كافيهات وسفر؟
زمان: الناس كانت بتروح الملاهي والحدائق العامة، واللي عنده عجلة كان ملك الشارع.
دلوقتي: الاتجاه بقى للسفر والسهر في كافيهات شيك بدل الخروجات الشعبية البسيطة اللي فيها روح العيد بجد.
