مصر بلد المواهب، غنا ومزيكا في كل مكان، وعلاء الراوي نموذج لفنان مصر مجتهد، شغله كـ كابتن في إحدى شركات النقل الذكي مامنعهوش عن حلمه الأساسي، وهو الغناء. علاء الراوي درس موسيقى، وعشقه للفن بيخليه يغني وهو طاير بالعربية في شوارع القاهرة. تعالوا نتعرف أكثر على موهبة مصرية.

عرفنا بنفسك وبدراستك؟

أنا المطرب والملحن علاء الراوي، درست في كلية التربية الموسيقية فرع الزمالك، شغلانتي الأساسية مطرب في الأفراح، لإني عضو نقابة المهن الموسيقية، وفي الوقت الفاضي، بطلع مشاوير بالعربية.

هل احترفت الغناء بره مصر؟

اشتغلت 10 سنين في الإمارات، وعملت حفلات لشخصيات مهمة زي السفير الكويتي، والشيخة بدور بنت حاكم الشارقة، وحلفة لمدير توزيع شركة روتانا في الجميرا في دبي. باعتبارك كمان كابتن في إحدى شركات النقل الذكي، هل بتحب أكتر تغني وأنت في العربية للعملاء ولا لوحدك؟ طبعًا لما بيكون معايا عميل بحس إنه شبهي بيحب المزيكا، بغني أنا وهو، أغانينا الشرقية الجميلة.

شوارع القاهرة بتلهمك للغناء؟

أكيد لما بكون في أطراف القاهرة أو قرب المناطق الزراعية، الأماكن دي بتشجعني على الانسجام مع المزيكا والغناء بشكل كبير.

هل استغليت السوشيال ميديا علشان تدعم موهبتك؟

بالفعل عندي قناة على يوتيوب وصفحة رسمية على موقع تيك توك، بنشر عليهم مقاطع غنائية بصوتي من وقت للتاني.

نفسك تقدم دويتو غنائي مع مين من المطربين أو المطربات؟

الحقيقة حلمي أقدم دويتو مع المطربة شيرين عبد الوهاب أو جنات. كلمنا عن أحلامك؟ بتمنى يكون عندي في يوم من الأيام شركة إنتاج خاصة بيا، علشان أقدر أنفذ أغاني أكتر ليا ولمطربين جيلي.