الصور من: إبراهيم قنديل

كلنا عارفين إن رمضان في مصر حاجة تانية، زينة وفوانيس وأغاني وروحانيات ماتتوصفش، تقريبًا كده مفيش شارع فيكي يا مصر إلا وهيعيشك رمضان على حق.

وفي المقال ده، هندردش معاكم في أكتر من حاجة، أولها إن "دولة المطرية" زي ما بيسموها أهلها، كانوا عاملين إفطار جماعي سنوي، بيتعمل يوم 15 رمضان علشان يملى الشوراع فرحة وبهجة وخير، والسنة دي كان الإفطار رقم 10.

طبعًا الاحتفالات واللمة كانت نقصاكوا، وحاجات كتير عجبتنا في إفطار السنة دي منها علم فلسطين اللي رفعه أهالي المطرية وكمان هتافهم لدعم إخواتنا الفلسطينين اللي كان بيرج الأرض.

بس الغريب واللذيذ في نفس الوقت، إنه كان موجود عرض أزياء لمجموعة شباب مسمين نفسهم "risky boys” قدموا عرض أزياء هناك، هما معروفين بملابسهم الكلاسيك شوية، والعرض كان عامل ميكس مع الأجواء الرمضانية خطير بجد. (تقدروا تتفرجوا عليه من هنا)

على فكرة الإفطار كان متوزع على 750 ترابيزة، وكان بيضم 2 طن فراخ و50 ألف حلة محشي ومشاوي ومندي وورق عنب، كمان الشباب المنظم للحدث كانوا متعاونين وبيحاولوا يبسطوا الكل.

عمار يا مصر