في خطوة جديدة على المشاهد، عرضت منصة نتفليكس مؤخرًا، مسلسل "أبلة فاهيتا: دراما كوين"، وده أول عمل درامي تلفزيوني من بطولة الدمية اللي مولعة الدوبليكس. وواحد من أعمال المنصة العربية الأصلية. المسلسل حقق نجاج كبير. واتصدر نسب المشاهدة في أكتر من دولة عربية على رأسهم طبعًا مصر.
علشان كده حبينا نحكي لكم تفاصيل أكتر عن العمل ده، تعالوا نعرفها:
1- المسلسل بيتكون من 6 حلقات، مدتها مبتعديش الـ 3 ساعات، ومناسب للأشخاص فوق الـ 16 سنة.
2- قصته بتبدأ بنجاح الأبلة اللي بقى ليها جمهور كبير، لكنها بتتعرض لموقف محرج في واحدة من حفلاتها، وده بيخليها تتعرض للانتقاد من وسائل الإعلام والمنتجين بيبعدوا عنها، فبتمر بأزمة مالية، وبتضطر تخضع لرغبة منتج مغمور اسمه (فايز مانجو) بيجسد دوره باسم سمرة، عنده ملهى ليلي وكان بيحاول يشغلها معاه لكنها كانت بترفض، فبتضطر توافق على شروطه اللي عكس رغبتها، وبتنفعل عليه وبيحصل بيهم خناقة بتنتهي بقتله في ظروف غامضة، وبتهرب "فاهيتا" وتبدأ رحلة البحث عن دليل براءتها، بمساعدة بائعة الفل "سماح" اللي بتجسد دورها دنيا ماهر.
3- بنشوف كمان "كارو" ابنة فاهيتا في دور أكبر، وده على عكس ظهورها السريع في برنامج "الدوبليكس"، ده بجانب تنكر فاهيتا في شخصية الإعلامية "بوسي شلبي"، الأمر اللي بيضيف للحلقات طابع كوميدي مميز.
4- بيضم العمل استعراضات وأغاني وموسيقى تصويرية مبهرة وجذابة للموزع حسن الشافعي.
5- تأليف العمل للأبلة بالمشاركة مع محمد الجمل، جورج عزمي، دنيا ماهر، محمود عزت. وقام بإخراجه خالد مرعي.
