بيحتفل العالم النهارده 19 نوفمبر، باليوم العالمي للرجل، كنوع من تكريم الرجل وتعزيز دوره الإيجابي في المجتمع، الأكيد إن كل واحد مننا عنده رجل معين أثر في حياته بطريقة ما، لكن في رجال بعينهم سابوا بصمة وذكرى متتنسيش في حياة معظمنا، ومينفعش اليوم ده يعدي من غير ما نحتفل بيهم لإن وجودهم مكنش عادي في حياتنا، يالا نفتكرهم:

 1- مجدي يعقوب

ملك قلوب المصريين، وواحد من أشهر رواد جراحة زراعة القلب في العالم، مسيرة إنسانية علمية مليانة بالألقاب والجوائز والأوسمة والعمليات الصعبة والناجحة، صانع الأمل في قلوب كتير من المرضى جوه مصر وبراها، وكونه مصري سبب كبير للشرف بمصريتنا.

2- أحمد زويل

رجل مصري آخر يدعو للفخر على مدار سنين طويلة ارتبط اسمه بجائزة نوبل، أبحاثه كان لها الفضل في ثورة هايلة في العلوم الكيميائية واستخدام أشعة الليزر، صحيح هو رحل عننا بجسده لكن سابلنا موسوعة علمية بيتعلم منها كبار علماء العالم يوم بعد يوم.

 3- عبد الحليم حافظ

رغم مرور الزمن على رحيله، لسه صوته وأغانيه الجميلة بتحرك قلوبنا ومشاعرنا، تأثيره عابر للأجيال من المحيط للخليج، ولحد النهارده يعتبر إيقونة الغناء والطرب الأصيل لكل المطربين والمطربات، وتقريبًا مفيش واحد قلبه دق إلا ولاقى نفسه في أغنية من أغاني العندليب الأسمر سواء كانت حب أو شجن.

4- عمر الشريف

العالمي، سارق قلوب العذارى، فنان استثنائي وموهبة من طراز خاص، عشق الفن وضحى بحب حياته وسعادته الزوجية علشانه، كان ومازال نموذج للفنان العربي الطموح اللي قدر يوصل للعالمية ويلمع نجمه فيها كمان.

 5- محمد صلاح

كل كام سنة يطل علينا نجم مصري، علشان بس يثبتلنا فكرة إن فعلًا "مصر ولادة"، الفرعون المصري "مو صلاح" قدر في سنين قليلة يرجع الفرحة لقلوبنا ويسحرنا بجمال أدائه في كل مباراة بيلعبها، ورغم إن المنافسة قوية لكن فخر العرب قدها.