النهارده، 8 مارس، بيحتفل العالم كله بدور المرأة في المجتمع كنوع من الاعتراف والتقدير لإنجازتها وتضحياتها. وبالمناسبة دي تعالوا نتعرف على شوية حاجات الستات من حقها تعملها من غير مانصدر أحكام ضدها.

1- ماتحبش شغل البيت

لسه فيه ناس شايفة إن البنت مكانها الطبيعي هو المطبخ، ولسه فيه أهالي أول حاجة بيعلموها لبناتهم هي الطبخ، والغسيل، شغل البيت يعني. وطبعًا الكلام ده اختصر كيان المرأة كله في المطبخ! لكن ياجماعة مش كل البنات ميولها زي بعض، يعني متتفجأوش لما تلاقوها مش حابة الفكرة واهتماماتها في سكة تانية.

2- تهتم بنفسها مهما كان سنها

فيه فكرة منتشرة إن الست لما تكبر، المفروض تبطل تهتم بشكلها وشعرها ولبسها، علشان عيب دي كبرت! والحقيقة إن الست بفطرتها بتحب دايمًا تشوف نفسها جميلة مش علشان حد، فشجعوهم على الجمال في أي سن.

3- مش مجبرة تصرف على البيت

ستات كتير ونماذج طموحة، بتختار تشتغل وتحقق نفسها، وأوقات ده بيعرضها لنوع من الابتزاز المادي، خاصة لو شريك حياتها مش سوي، فبيخيرها ما بين إنها تصرف على البيت مقابل إنه يسيبها تشتغل. ضروري بعض الرجالة تعرف إن الست مش واجبها تصرف، وفي نفس الوقت مفيش مانع تعمل ده من باب المشاركة في الحياة مش الإجبار.

4- ماتتجوزش خالص أو تأجل فكرة الجواز

مش كل البنات أولوياتها واحدة، فيه بنت تحب تكون أسرة وبيت، وغيرها طموحها في السفر والتعليم، ونوع تاني خالص معندهاش هوس بفكرة الجواز والارتباط، وعلى فكرة بتكون بني آدم طبيعي عادي، بس مكتفية بنفسها وعندها أسبابها. فكفاية بقى نقولهم هنفرح بيكي إمتى؟ لإن الكون أكيد فيه حاجات تانية ممكن تفرحكم بالبنات.

5- تسافر لوحدها لما تحب

الموضوع مش مقتصر على سفر الفسح والرحلات، فيه بنات بتتحرم من إنها تكمل تعليمها، لو الكلية اللي هتدرس فيها برة محافظتها. وده غالبًا بيكون بدافع خوف أهلها عليها. ولو حصل وسافرت، بتلاقي تعليقات سخيفة من كل اتجاه.

6- تلبس إللي يعجبها عادي

لبس البنت مش دليل على سلوك معين، لبس البنت اختيارها وذوقها وراحتها وحريتها، فياريت ما نتدخدلش في خصوصية غيرنا، ونفرض عليهم يلبسوا إيه ومايلبسوش إيه، والأهم إن لبس البنات مش مبرر للتحرش أبدًا.

7- تعيش لوحدها

لو البنت سابت بيت أهلها علشان ظروف شغلها أو دراستها، بتواجه سخافات مش منطقية، وكأنها عملت جريمة، يا جماعة حقيقي دي تفاصيل طبيعية ومتستاهلش الأفورة دي.

8- لو اتعرضت للتحرش تقول من غير خوف

نسبة كبيرة من البنات اللي اتعرضت للتحرش، اتقالها من اللي حواليها كلام من نوعية "خلاص بقى إسكتي وعديها، إنتي بنت خافي على سمعتك"، في زماننا ده مبقاش ينفع الكلمتين دول، لإنهم ولا هيحلوا المشكلة ولا هيكونوا خطوة تمنع أي متحرش إنه يعمل ده تاني، بالعكس. وفي الفترة الأخيرة بنات كتير خدت حقها بعد ما اتكلمت بكل صراحة. نتمنى نكمل كده ونكون سند للضحية مش ضدها.

9- تركب عجلة أو سكوتر

البنت ممكن تسوق عربية عادي، لكن أول ما تسوق إسكوتر أو حتى عجلة الكل يستغرب. ويبقى يومها مش فايت لو وقفت في إشارة، النظرات بتبقى جاية من كل اتجاه. مع إن الموضوع بسيط ومش مستاهل.

كل عام وكل زوجة، أم، أخت، إبنة، طفلة، شابة، مسنة، عزباء، مطلقة، أرملة في العالم جميلة.