بنستقبل أجمل مناسبة في حياة كل أسرة.. وهي عيد الأم، اللي مهما جيبنالها من هدايا مش هنقدر نرد لها جزء بسيط من جمايلها علينا. وبما إننا لسة في مرحلة شراء الهدية لست الحبايب، حبينا نقولكم على كام هدية كده ناس كتير اتعودت تشتريها لأمهاتها في عيد الأم، لحد ما بقت إيقونة اليوم ده، رغم إن عدم شراؤها أحسن.. تعالوا نعرفها:
-طقم الكوبايات إياه
احتار العلماء في الوصول للعلاقة اللي بتربط عيد الأم بهدية طقم الكوبايات! والحقيقة لسة ماوصلوش للإجابة ولسة كمان ناس بتفكر تشتري لأمهاتها الهدية الأزلية دي، والأغرب من كده إنك مش هتلاقي حد بيشتري لوالدته كوبايات في عيد ميلادها مثًلا، وكأن عيد الأم هو مناسبة طقم الكوبايات، فخليك مختلف السنة دي وابعد عنه.
-أدوات المطبخ
صحيح بقت مريحة وبتسهل على ست الحبايب أمور كتير في المطبخ، لكنها مش مناسبة خالص ليوم عيدها، يعني الطاسة السيراميك أو حلة الرز عمرها ما هتوصل درجة الحب والمشاعر اللي في قلوبنا للأمهات بشكل حقيقي، كفاية حلل وصواني يا جماعة.
-أي هدايا منزلية
فوط، ستائر، أو حتى غسالة بروحين، كل دي أدوات تقدر تجيبها في عروض يوم الجمعة السوداء وإنت بتزور والدتك إنت والمدام والأولاد لو كنت متجوز، أما لو لسة سينجل ممكن كمان تاخدها وتنزلوا تشتروها سوا، لكن عيد الأم يعني هدية ليها هي مش للبيت ولوازمه.
-تحف وبراويز وأنتيكات
هدية عجيبة برضه، مش هستفاد بيها أو حتى هتفرح قلبها، صحيح هي هتفرح لإنك فاكرها، لكن فرحتها هتكون أكبر لما تفاجأها بهدية كانت نقصاها هي شخصيًا وتجيبهالها من غير ما تسألها.
-أجهزة إلكترونية معقدة
مش كل الأمهات بتهتم بالتكنولوجيا وأحدث سمارت فونز نزلت في السوق، فبلاش هديتها تكون مش من اهتماماتها أو على هواها، وأكيد إنت عارف ذوقها بيميل لإيه أكتر.
لو احترت ومش عارف تجيب لمامتك إيه، دوس هنا
"كل سنة وكل أم في العالم بخير وسلامة".
