زي اليومين دول من 13 سنة، انطلق موقع كايرو 360، وسنة وراء سنة، قدر يحجز مكانه ويسيب بصمته الخاصة جدًا، وسط مواقع إلكترونية كتير، ومن أول يوم، كان الرهان على تقديم مواضيع مختلفة ومطرقعة مع جرعة يومية مفيدة، عن اللي كل اللي بيدور في القاهرة ونيلها وليلها.

وبالمناسبة السعيدة العزيزة علي قلوبنا دي، إحنا في "كلام القاهرة" حابين ندردش معاكم في 13 سبب خلونا نحب كايرو 360 وبكل حيادية، يالا بينا:

1- الخروجات

مين فينا مابيحبش يخرج ويتفسح، على كايرو 360 هتلاقي دليل كامل بكل الحفلات الفنية، اللي بتحصل في كل حتة في القاهرة. بصة صغيرة كل يوم على قائمة الإيفينتات، وهتقدر تحدد سهرتك فين.

2- المطاعم

زي ما بيقولوا كده "إسأل مجرب"، لو جعان إسأل كايرو 360، هتلاقي ريفيو لمطاعم كتير بكل التفاصيل. من أول المكان، للخدمة، لحد المنيو، ده غير ترشيحات كتيرة لأفضل المطاعم في فئات مختلفة.

3- الأفلام

الخروجات مش بس حفلات ومطاعم، ممكن الخروجة تبقى فيلم في السينما. وفي ده هم متوصيين بزيادة. مش بس كل أسبوع هتعرف إيه الأفلام الجديدة المعروضة، انت كمان هتلاقي ريفيو لكل الأفلام دي. يساعدك تختار الفيلم اللي بتحبه على مزاجك.

4- الكتب

لو بتحب القراية والكتب، برضو هتلاقي ريفيوهات وترشيحات لكتب من كل المجالات. فلو محتار في حاجة جديدة تقراها، ماتفكرش وروح لكايرو 360.

5- السفر

هتلاقي موضوعات كتيرة ومختلفة تخص السفر. بدايةً من النصايح الخاصة به، لحد الوجهات المختلفة وطرق الحجز. حتى لو مبتديء وخبرتك قليلة، هتعرف كل المعلومات الأساسية اللي تساعدك لو أخدت القرار. هتسافر يعني هتسافر.

6- المهرجانات الفنية

مستحيل يبقى فيه مهرجان فني بيتم على أرض القاهرة، ومش منشورة تفاصيله على كايرو 360. هتعرف أخبار كل الفعاليات الفنية والثقافية بكل أنواعها. وكمان هتلاقي تغطية كاملة ليها من كافة الجوانب.

7- المبادرات الشبابية

دايمًا هتكون على دراية بالمشاريع الصغيرة والمبادرات الشبابية، اللي بتتم في القاهرة أو برة القاهرة. الأفكار المميزة بتظهر طول الوقت، ولازم تاخد حقها في الانتشار. لأنها دايمًا بتشجع على مشاريع تانية زيها.

8- الوِرش

لو عندك موهبة وعايز تنميها، هتلاقي دليل بكل الأماكن والورش اللي تساعدك في ده. ورش الرسم، الموسيقى، الكتابة، الحرف المختلفة. مش محتاج تدور كتير وانت عندك المصدر.

9- التراث

هتعرف أكتر عن تراث مصر القديم والجميل، بكل تفاصيله وبمعلومات ممكن تعرفها لأول مرة. هتلاقي صور وحكايات زمان.

 10- عاملين حساب الميزانية

في كل مرة هتحتاج تعزم أصحابك على الغدا، أو تزور مكان جديد، أو تدخل السينما أو المسرح، هاتلاقيهم  كاتبين لك أسعار الأكل/ المواصلات/ التذاكر.. ، يعني هاتلاقي دايمًا خروجه على قد الميزانية.

11- الروقان

متابعتك لـ كايرو 360، مش مجرد لايك والسلام، هتاخدك لموود رايق، هتتعرف على أماكن وأحداث، ممكن تكون مسمعتش عنها قبل، فا هتوصل لمستوى تاني من الانبساط.

12-الخدمة

هدف فريق كايرو 360 خدمة كل قارئ بيزور الموقع، وأنت في مكانك هينقلوا لك تفاصيل الأحداث الفنية والثقافية والسينمائية وأكتر وأكتر.

13- القاهرة

سواء من سكانها أو ضيف فيها، كل حاجة محتاج تعرفها عن القاهرة، هتعرفها من كايرو 360. لأنه دليلك الشامل لكل شارع فيها، ولأي حاجة بتحصل. هتتابع الأحداث وكل جديد لحظة بلحظة. ده غير إنك هتتعرف على كل حاجة بتسهل حياتك فيها، زي التطبيقات المختلفة. أو الخدمات اللي بنحتاجها بشكل أساسي في حياتنا اليومية.

ده كله كان نقطة في بحر من الخدمات والمعلومات، اللي بيقدمها موقع كايرو 360 بشكل يومي. ولما تتابعوه هتعرفوا أكتر.

كل سنة وكايرو 360 دايمًا متميز ومختلف.