6 ديسمبر، هو يوم ميلاد الفراشة الجميلة "شيريهان"، النجمة اللي حاجزة مكانها في قلوبنا وكمان على الشاشة، ورغم غيابها الطويل لسه مؤثرة، ونحب نشوفها أكتر وأكتر.
وعلشان كلنا متشوقين نشوف أعمالها على الساحة طول الوقت، هندردش معاكوا في أسباب تخلي رجوع شيريهان ضروري.
حالة فنية حلوة
أدائها ونظرات عينيها وكلها على بعضها، بيخلينا مستمتعين وإحنا بنتفرج عليها، تخيل كده تشوف شيريهان على الريد كاربت أو ضيفة في برنامج فني، أو بتتكرم في مهرجان. تخيل برضه لو شوفت صورتها على "أفيش" فيلم، شيريهان رجوعها هيكون إضافة كبيرة للفن ولينا.
نجاح ظهورها الأخير
2021 كان عام خروج الفراشة من شرنقتها، بعد تأجيل وتردد، قدمت شيريهان مسرحية "كوكو شانيل" على منصة شاهد، شوفناها كمان في إعلان رمضاني، ملى قولبنا بهجة وفرحة ماحدش كان يتخيلها.
فنانة محترفة
اشتغلت مع كبار نجوم وصناع الفن، يعني عندها من الخبرة اللي يخليها تختار أعمالها بدقة، وبالتالي هتقدم أعمال تستحق المشاهدة، وهنتبسط كلنا.
الكاميرا والناس بيحبوها
في عالم الفن حب الناس مكانته متقلش عن موهبة الفنان، أوقات كمان بيسبقها، شيريهان رغم غيابها سنين طويلة، لسه حبها ثابت في قلوب ناس كتير، ده سبب يخليها ترجع وتستمر.
لسه عندها كتير
شيريهان من بدايتها طاقتها الفنية كبيرة، صحيح اتعرضت لأزمات سحبت منها طاقتها، لكن إحنا متأكدين إنها عندها كتير تقدمه لجمهورها، بشهادة أساتذة الفن في مصر.
كل سنة وأنتي طيبة يا قوية يا جميلة.
