في ناس بتغني عشان الشهرة، وفي ناس بتغني عشان الناس، وطبعًا حماقي اختار الناس، النهارده 4 نوفمبر بنحتفل بعيد ميلاده، وقولنا ندردش معاكم شوية عن 5 أسباب خلونا نحب حماقي الحب ده كله؟

1- بيغني للطيبين

حماقي مبيغنيش للعلاقات السامة، ولا بيلوي دراع الحبيبة، بيغني للي لسه مؤمن إن الحب يستاهل يتعاش.

2- بيغني بشياكة

ولا مرة نزل في مستوى الكلام أو اللحن عشان يبقى على الموجة، والأجمل إنه حتى لو الأغنية حزينة، مبيجرحش ولا بيهدد، بالعكس إحساسه راقي، يعني حتى الزعل عنده شيك.

3- أغانيه بتعيش

“عارفة أحلى حاجة فيكي إيه“، جيل كامل ليه ذكريات معاها، والنهارده بنسمعها عادي ومبسوطين بيها.

4- صوت بيطبطب علينا

تلاقيه مونسك من غير مايدوس على وجعك، كأنه صاحبك اللي فاهمك ومش محتاج تشرحله كتير.

5- مش محتاج يقول أنا نجم

بيقنعك بإن الهدوء قوة، وإن الفن مش سباق وتريندات، حماقي حالة حلوة ونادرة كمان.

كل سنة وإحنا بنحبك يا فنان.