تطوارت ماتجيش على بال حد، حصلت في أزمة الفنانة شيرين عبد الوهاب مع عيلتها، في الساعات القليلة اللي فاتت، والموضوع زاد أكتر بعد ظهور حسام حبيب في المشهد.

تعالوا نشوف كده حصل إيه؟

1- بعد المحضر اللي تقدم بيه المحامي الخاص بيها ضد شقيقها محمد عبد الوهاب، صرح الأخير في مداخلة هاتفية مع الإعلامي عمرو أديب في برنامج "الحكاية"، بإن شيرين مأجرة شقة في التجمع الخامس، وبتقابل فيها طليقها حسام حبيب، وبيشربوا مخدرات مع بعض، وإن مش هو اللي راح أخدها من المستشفى أصلًا، لكن المتخصصين هناك.

2- لأول مرة من بداية الأزمة، تدخلت والدة شيرين "كريمة أبو زيد"، وقالت مع عمرو أديب، إن بنتها بتتعرض لخطر بسبب حسام حبيب، وإنها اتفاجأت بوجوده معاها في استديو البيت، ولما سألته بتعمل إيه هنا؟ كان رده أنا هتجوزها! "ولما عاتبت شيرين قالتلي أنا شيرين عبد الوهاب أعمل اللي أنا عايزاه"، حسب كلامها.

3- مشهد تاني سبب جدل كبير على السوشيال ميديا، هو ظهور حسام حبيب ومديرة أعمالها السابقة سارة الطباخ، قدام المستشفى المحتجزة فيها شيرين، لساعات طويلة في انتظار النجدة علشان تخرجها.

4- أما من الناحية القانونية، فقانون رعاية المريض النفسي بالتحديد المادة 13 والمادة 14، بيحدد حالات العلاج الإلزامي النفسي، يعني الحالات اللي بيصرح فيها بإدخال المريض للمصحة بالقوة وبدون رضاه، وهنا بيلزم القانون المصحة النفسية والطبيب المعالج وأهلية المريض، بإبلاغ المجلس القومي للصحة النفسية خلال 24 ساعة من دخوله للمصحة، الأمر اللي بيهدد شقيقها وبيعرضه للمقاضاه لو كان معملش ده.

5- من ناحية تانية، بنات شيرين عبد الوهاب لسه مظهورش في المشهد، على عكس الأزمات اللي قبل كده، لكن بنتها الصغيرة "هنا"، نشرت من يومين فيديو على "تيك توك" كانت بتغني فيه.