من الواضح إن في أزمة حقيقية في طريقة التقاط صور بعض الجمهور والصحفيين مع الفنانيين مؤخرًا، مقدرين جدًا حب أو حتى هوس البعض بنجومهم المفضلين، لكن الأمر بيتطور زي ما كلنا بنشوف، وبيوصل لتصرفات غير محسوبة بتسبب مشاكل للطرفين ممكن توصل وصلت للقضاء.

أحمد عز كان هيقع بسبب الزحمة في مؤتمر ولاد رزق!

بعد انتهاء المؤتمر الصحفي الخاص بتفاصيل فيلم  "ولاد رزق 3 الضربة القاضية"، إمبارح، تجمع عدد من  الحاضرين، لالتقاط صور تذكارية توثق اليوم مع النجم أحمد عز، ولكن التدافع عليه بشكل عشوائي فقده توازنه، وكان هيقع لكنه تماسك! وظهرت على وجه تعبيرات الانزعاج، ومحصلش منه أي رد فعل عنيف بالعكس.

خالد النبوي شد الموبايل من شخص بيصوره

وقت دخوله على ريد كاربت فيلم "أهل الكهف"، من يومين، استقبل الفنان خالد النبوي عدد من الجمهور وكمان المصوريين والصحفيين، والحقيقة اللي بيروح سينما مول مصر عارف إن المسافة من بوابة الدخول لحد السينما مش قليلة، خالد كان حريص إن محدش يصيبه أي آذى، لكن في لحظة معينة شد الموبايل من أيد أحد الأشخاص وهو فاتح الكاميرا عليه وقاله: "هو أنا ممكن أطلب منك ماتصورنيش"، موقف تاني جوه قاعة السينما نفسها ظهر خالد النبوي وهو بيقول للمحيطين بيه: "ليه لازم تخبطوا فيا، الموضوع ده جديد ماكنش موجود قبل كده".

هنسيب ليكم التعليق.