مش كل الناس تعرف إن ياسمين صبري بدأت حياتها كمراسلة لقناة فضائية وبعدين اشتغلت موديل إعلانات، لحد ما ظهرت في برنامج "خطوات الشيطان" مع الداعية معز مسعود في رمضان 2013، خطفت عيون ناس كتير واعتبروها من أجمل الوجوه وقتها، وسنة ورا سنة دخلت عالم الدراما وكمان السينما.

ومن وجهة نظر البعض، ياسمين محظوظة بجمالها المميز بين فنانات جيلها، وده اللي خلالها توصل وتسرق الأضواء بسرعة، بس ده ما يمنعي إنها ذكية وبتعرف تخطف الفرص.

لكن ليه ياسمين دائمًا بتتسبب في كل الجدل ده على السوشيل ميديا؟

السطور الجاية مجرد محاولة للإجابة:

وصفها لنفسها في البرامج 

"أنا نعمة، أنا اتحب" وغيرها من التصريحات اللي بتقولها ياسمين عن نفسها في كل مرة تظهر فيها ببرنامج، واللي البعض بيعتبرها حب الذات أو غرور، لكن ياسمين شايفة إن كل واحد مننا يعلن عن إيجابياته زي ما طول الوقت بنقول عن سلبياتنا.

بتستعرض ثروتها

صور استمتاعها بحياتها الشخصية خصوصًا محور اهتمام كبير، يعني ولا صورة بتنزلها ياسمين إلا وكان بيتم تحليل كل تفصيلة فيها، بعض الناس بتشوف فيها نوع من الاستعراض والتباهي، وكان ردها على ده  بإن معظم ملابسها وشنطها بيكون ببلاش إعلان لشركات تانية.

الفن مش هدفها الأول

جمال ياسمين ناس كتير اتفقت عليه، والدليل إنه تم اختيارها 4 مرات ضمن أجمل 100 وجه في العالم، لكن موهبتها واختيار أدوارها فيه اختلاف شوية، ومن وجهة نظرالنقاد محتاجة تاخد دروس تمثيل وتغير نوع الأدوار اللي بتقدمها علشان تتميز أكتر كفنانة.

بتقلد عارضة الأزياء جورجينا

في طريقة اللبس وتسريحة الشعر والمكياج، كان في تشابه كبير بينهم، وبدأت الناس تربط بين الشخصيتين وتقول إن ياسمين بتحاول تقلد عارضة الأزياء جورجينا رودريجز حبيبة اللاعب كريستيانو رونالدو، وبدأوا يجمعوا صورهم وينشروها على السوشيال ميديا والموضوع اتحول لكوميكس.

جمالها أهم من مصداقيتها

ياسمين صبري أثارت جدل كبير، خلال اليومين اللي فاتوا، لأكتر من سبب، منهم ظهورها على بوستر مسلسل "رحيل"، وهي عاملة أظافرها بـ هارد جيل، وده عكس طبيعة الشخصية اللي هتظهر بيها، كا فتاة من منطقة شعبية بتشتغل مهندسة، والأمر ده لاحظه الجمهور في أكتر من عمل ليها.