في ليلة كانت المفروض تبقى مميزة في قصر البارون بمصر الجديدة، مساء السبت، حصلت حاجة غير متوقعة خالص! قبل ما تامر حسني يطلع يغني في مؤتمر طبي بدقايق، "ستاند" الإضاءة وقع فجأة على الجمهور، وده اتسبب في إن الفقرة تتلغي قبل ما تبدأ!
اللي حصل بالظبط إن الستاند المعدني اللي كان شايل الإضاءة والشاشات وقع وسط الناس، وأصاب حوالي 13 شخص بإصابات خفيفة وكدمات، طبعًا سيارات الإسعاف وصلت بسرعة، واتعاملوا مع المصابين، بعضهم اتعالج في مكان الحادث، والباقي اتنقلوا مستشفيات قريبة زي مستشفى هليوبوليس.
تامر حسني نشر ستوري على إنستجرام شرح فيها إنه مش منظم الحفلة دي، وإنه كان جاي يغني كفقرة فنية ضمن مؤتمر طبي، وأكد إنه متضايق وحزين على اللي حصل، ودعا للمصابين بالشفا العاجل؛ وكمان وضح انزعاجه من المواقع اللي قالت إن الحادث حصل في حفلته الخاصة، وقال: "مااسمهاش حفلة تامر حسني"!
رفضت مديرة قصر البارون، الدكتورة بسمة سليم، التعليق على اللي حصل، وأكدت إن وزارة السياحة والآثار هي اللي هتطلع بيان رسمي توضح فيه تفاصيل الواقعة.
أما الشرطة، فانتقلت على طول لمكان الحفلة، وحررت محضر رسمي بالواقعة، وبدأوا تحقيق مع الجهة المنظمة للمؤتمر عشان يعرفوا سبب الإهمال وإزاي الستاند وقع بالشكل ده.
