النهارده 17 مايو، بيحتفل النجم الكبير عادل إمام بعيد ميلاده الـ 83، قدملنا من عمره 60 سنة ضحك وبهجة، وطول السنين دي فضل نجم مصر الأول، وشوقنا لفنه بيزيد.
وبالمناسبة السعيدة دي، عملنا بحث بسيط ووصلنا لـ 5 أسباب خلتنا نحب عادل إمام الحب ده كله، يالا بينا نعرفهم:
1- بيضحكنا بريأكشناته بس
من المستحيل تشوف تعبيرات وش "الزعيم" ومتضحكش، الفنان الوحيد اللي يقدر يضحكك بأقل مجهود، من غير ما يتشقلب ولا يرمي إفيه واحد، نظراته بتتكلم وبتقول كلام يتكتب في مشاهد.
2- فخر وعلامة من علامات مصر
مصر يعني الأهرامات وعادل إمام، الأكيد إننا نملك عظمة وعظماء مالهومش عدد، وبيجي ضمنهم الفنان عادل إمام، اللي ذكر اسمه بيحسسنا بقيمة الفن المصري.
3- كلنا حلمنا نشوفه ونتصور معاه
ذكرياتنا لو هنعملها موسيقى تصويرية هتكون أفلام ومسرحيات عادل إمام، أجيال كتير فتحت عينها على صور عادل إمام ملزوقة في الشوارع والعربيات وأماكن أكتر، واللي كان بيقابله ويتصور معاه كان يابخته، يعني مش بس حلم لأي فنان إنه يقف قدامه حتى لو في مشهد صامت، كمان حلم أي مواطن مصري عاشق لفن بلده.
4- مصنع إيفيهات
"كل واحد يخلي باله من لغاليغه"، "متعودة دايمًا"، "إزاي ياجدع"، "بتعرف تعد لحد كام" هتلاقي إيفيهات، الغريب إنها اتقالت من سنين، بس لسه بتضحكنا بجد، غالبًا برضه الفنان الوحيد اللي بيملك مخزون استراتيجي من الإفيهات الخفيفة على قلوبنا.
5- أعماله ليها رسالة
في أكتر من عمل قرر "الزعيم" يغير جلده، وميوقعش في فخ الشخصية الواحدة رغم نجاحه الكبير والمضمون في الكوميديا، لكنه غامر وقدم أدوار صدمت ناس كتير، بسبب قصتها وجرأتها زي فيلم "إحنا بتوع الإتوبيس وحب في الزنزانة والإرهاب والكباب".
