ظهرت الإعلامية مها الصغير في برنامج "معكم مع منى الشاذلي"، وأعلنت عن شغفها بالرسم وعرضت مجموعة من اللوحات الفنية، وقالت إن هي اللي رسمتهم بنفسها!
من بين الأعمال، عرضت لوحة بعنوان "صنعت لنفسي بعض الأجنحة"، وهنا كانت الأزمة، بعد اكتشاف صاحبتها الأصلية حقيقة الأمر، وهي الرسامة الدنماركية ليزا لاش نيلسون، وكانت رسمة اللوحة دي سنة 2019، يعني مش مها الصغير خالص!
ليزا مسكتتش، نشرت على إنستجرام بوست وضحت فيه، أن لوحتها طرحت في برنامج من غير الإشارة ليها! لأ وكمان تم نسبها لمها الصغير، واعتبرت ده "جريمة" بموجب القانون المصري وحقوق الملكية الدولية.
وبعد وقت قليل من اكتشاف الحقيقة، اعتذرت منى الشاذلي وأكدت أن اللوحة فعلاً من ابداع الرسامة الدنماركية ليزا لاش نيلسون، مؤكدة احترامها للمبدعين الحقيقيين، وحذفت الجزء ده من الحلقة.
مش بس كده، دخل عدد من المصريين على حساب ليزا، واعتذرولها، وهي ردت عليهم وقالت إنها عارفه أن التصرف ده مبيمثلش المصريين.
ولسه لحد كتابة المقال ده مفيش أي رد من مها الصغير على الموقف كله.