في أول تعليق رسمي من العيلة بعد الحادثة اللي اتعرض لها الفنان أحمد سعد على طريق العين السخنة، خرج دكتور سامح سعد – شقيق الفنان – ووجه رسالة طمأنة واضحة لكل جمهوره.

سامح أكد إن حالة أحمد مستقرة وبخير، وإن كل الأخبار اللي بتتكلم عن إن الحادث سبب له شلل ملهاش أي أساس من الصحة، وإن الحالة بعيدة تمامًا عن الكلام ده.

التصريح ده جه بعد ساعات من انتشار شائعات سببت قلق للجمهور على السوشيال ميديا، دكتور سامح شرح إن الحادث حصل أثناء رجوع أحمد من إحياء فرح، وإن العربية وقعت في حفرة كبيرة على الطريق بسبب خطأ في اتجاهات الـ GPS، واللي ودى السواق لمسار غلط.

ووقتها كان أحمد قاعد جنب السائق، وده اللي خلى قوة الخبطة تيجي عليه بشكل مباشر، ورغم إن المشهد كان صعب، لكن الحمد لله النتيجة أقل خطورة مما كان الناس متوقعة.

وبخصوص الإصابات، وضح سامح إن أحمد اتعرض لـ كدمات وشروخ بسيطة في الفقرات القطنية، وإن الإصابة محتاجة راحة ومتابعة بس، ومفيش أي تدخل جراحي مطلوب.

وأكد إن أحمد بيمشي على رجله بشكل طبيعي، لكنه لابس حزام طبي للظهر علشان يحافظ على الفقرات خلال الأيام الجاية، والأطباء متابعين حالته أول بأول وإنهم شايفين إن التطور إيجابي.