حسمت كندة علوش الجدل اللي أثير مؤخرًا على مواقع التواصل الاجتماعي، بعد انتشار فيديو ليها مع زوجها عمرو يوسف وأسماء جلال، خلال العرض الخاص لفيلم "السلم والثعبان 2"، خلى الجمهور يعتقد إنها بتغير على جوزها وبتحاول تبعده عن أسماء جلال.

وخلال استضافتها مع الإعلامية إسعاد يونس في برنامج "صاحبة السعادة"، أكدت كندة علوش إن الكلام عن غيرتها من أسماء جلال مجرد شائعات، موضحة إنها مش تحضر العروض الخاصة لأعمال زوجها عمرو يوسف، عشان تسيبه يركز في شغله، لكنها قررت تحضر العرض الخاص لفيلم "السلم والثعبان 2" لأنها كانت عايزة تشوف الفيلم بنفسها.

وعن الفيديو اللي ظهرت فيه وهي بتتحرك مع عمرو يوسف بعيدًا عن أسماء جلال، قالت: "هو واقف هو وأسماء جلال حبيبتي والأستاذ طارق وكل نجوم الفيلم، وأنا جيت وقفت هنا، فبعد كدة المصورين بيقعدوا يقولوا لك إيه روحي كدة، امشي كدة، فـ بسمع الكلام، فخدته وبروح للمحطة الثانية اللي هنتصور فيها، فطبعًا طلعوا الفيديو إني بسحبوا من أسماء جلال".

وأكدت كندة علوش إن أسماء جلال صديقتها وحبيبتها، وإنها بتتمنالها النجاح والتوفيق، زيها زي أي فنانة تانية بتشتغل مع عمرو يوسف، مشددة على إنها عمرها ما كان عندها مشكلة مع الموضوع ده، وإن علاقتها بزميلات زوجها قائمة على الود والاحترام.