في قرار بيمنح المواطنين حق الوصول لشواطئ الإسكندرية، وجه الرئيس السيسي بمنع إقامة منشآت أو أعمال على مسافة 200 متر من خط الشاطئ من غير الموافقات المطلوبة، والقرار ده ساري على المشروعات الجديدة فقط.
وفي نفس الوقت، بدأت محافظة الإسكندرية في إجراءات إزالة المنشآت والكيانات السياحية القريبة من البحر، واللي بتحجب رؤية المواطنين للبحر، بعد ما انتهت مدة عقودها.
يعني ببساطة، أي مكان عقده لسه ساري هيكمل عادي لحد نهاية المدة القانونية، لكن بعد انتهاء العقد مش هيتم تجديد التعاقدات المخالفة.
وأكد محافظ الإسكندرية إيمن عطية إن البحر ورؤيته والوصول للشواطئ حق للمواطنين، وده في إطار تنفيذ توجيهات الرئيس عبدالفتاح السيسي بالحفاظ على حق الناس في الوصول للبحر.
وكمان المحافظة هتواجه أي محاولات لفرض رسوم على المواطنين من غير سند قانوني، أو تأجير أماكن للجلوس على الكورنيش بشكل مخالف.
مش بس كده، تم التشديد على تكثيف الرقابة على الشواطئ والكورنيش، ومتابعة المنشآت الموجودة والتعامل مع أي مخالفات.
والهدف من كل الإجراءات دي إن البحر يفضل متاح للناس، ومن غير منشآت أو مخالفات تحجب الرؤية أو تمنع المواطنين من الوصول للشاطئ.
