النهارده 4 نوفمبر، بيحتفل المصريين كل سنة في نفس التاريخ ده بـ "عيد الحب" المصري، بيتبادل فيه الحبيبة والمرتبطين الورود والهدايا والشكولاتة، صحيح ما إحنا شعب عاطفي ورومانسي بطبعه، والدليل على كده إننا بنتحفل بالحب مرتين، مرة النهارده ومرة تانية مع العالم كله يوم 11 فبراير.
وفي عيد الحب، فيه 4 شخصيات منتشرة في حياتنا، تعالوا نتكلم عنهم.
المتفاجئ
ده غالبًا مرتبط من زمان، والمناسبات دي مابقتش تفرق معاه خلاص، وتلاقيه كل شوية يكتب على الفيسبوك، ياجماعه هو النهارده عيد الحب بجد؟ حاجات شبه كده، وارد يكون عايز يخلع من الهدية برضه مين عارف، ومش بعيد تلاقيه قلب من بتوع الأباجوة دي حرام ويقول لك: "احذري يا أختاه".
اللي هيموت ويرتبط عشان الهدية
النوع ده يصعب عليك بس للأسف مش هتعرف تساعده، بالذات لما يشير البوست إياه، اللي بيعد فيه كام مرة عدى عليه عيد الحب وهو لسه سينجل حزين، ولا لما تعرف إنه عايز يرتبط في اليوم ده بس علشان يجيله هدية ويفركش تاني يوم عادي. ده ننصحه بقراءة الموضوع ده هيخليه ينبسط قوي. 6 فوائد للسنجلة ميعرفهاش المرتبط
المنفض
على الله حكايته خالص، برنس زمانه لا فارق مع حب ولا حبيبة واللون الأحمر مابيشفهوش أساسًا. تلاقيه كده متأثر بـ "الست" أم كلثوم لما قالت: "حب إيه اللي أنت جاي تقول عليه؟" فلو أنت مش مرتبط دور عليه وسط صحابك وقضي اليوم ده معاه هيعدي عليك هوا.
سومة العاشق
اللي بيعرفنا كلنا إننا في عيد الحب، ده يابخت اللي هترتبط بيه، هيغرقها هدايا ومفاجآت، ودي حبيبته مش هتضطر تقوله الجملة المشهورة عايزة ورد يا إبراهيم ولا هيقولها إن النص كيلو الكباب أحسن منه، وأنه شايف الكباب رومانسي أكتر من الورد. طبعًا ده هيشاركنا الفرحة على السوشيال ميديا بس براحة على "الستوريز" عشان مشاعر السناجل.
فريق كلام القاهرة بيهديكم أغنية الفنانة يسرا "حب خلي الناس تحب".
