وصلنا لـ عيد الأم اليوم اللي بنستناه طول السنة، وبنحوش له قبل ما ييجي بكام شهر، علشان نجيب هدية تليق بست الحبايب، ولو لسه مش عارف تجيبلها إيه! إحنا هنشاركك بأفكار لايقة على أجواء رمضان والعيد تفرح ست الحبايب في عيدها.. تعالوا نشوف:

1- دلعها بجلسة عناية بالبشرة

عيادات ومراكز تجميل كتير موثوق فيها، عاملة عروض وخصومات على العناية بالبشرة والشعر، ممكن تسألها محتاجة تعمل إيه وتحجزلها جلسة تدلعها.

2- اشتريلها لبس العيد

بما عيد الأم وعيد الفطر جايين مع بعض، وطول عمرها بتاخدك تشتريلك لبس العيد، خليها عليك المرة دي، واشتريلها حاجة تليق بيها على ذوقك وذوقها طبعًا.

3- اعزمها على الفطار

لو ست الكل ليها في أكل بره، أعزمها على الفطار في مكان مضمون، وخليها ترتاح من دوشة تحضير فطار رمضان النهارده، وياسلام بقى لو عملت حسابك في هدية، وفاجأتها بيها هناك.

4- قسيمة شراء

تقدر تفاجأها بقسيمة شراء، وتخليها تشتري اللي هي عايزاه براحتها، أسواق الأونلاين دلوقتي مغرقة الإنترنت، وهتلاقي خصومات كتير على حاجات بتحبها.

5- ساعدها في شغل البيت

لو الحكاية بايظة معاك اليومين دول! ومش معاك حق الهدية دلوقتي، ممكن تريحها من كل شغل البيت في اليوم ده، بإنك تصحى من بدري تروق أي كراكيب في البيت، وياسلام لو دخلت معاها المطبخ وحضرت أنت الفطار النهارده، ده لو ليك في الطبخ يعني، في اليوم ده خليها ملكة بجد، ومتنساش الهدية برده.