بسرعة بسرعة عدى أول أسبوع من رمضان، وشوفنا مين عمل إعلانات ومين شد الناس من أول حلقلة! يعني ملامح التليفزيون بانت للكل، وطبعًا السوشيل ميديا والتريندات قامت بالواجب كالعادة، فتعالوا نشوف مع بعض أكتر 5 حاجات شدت الناس في الكام يوم اللي فاتوا:

1- ملاحظات على "الإمام الشافعي" 

هنا بقى لينا وقفة، بعيد عن المجهود الكبير اللي باين في تفاصيل كل مشهد، كان في بعض الملاحظات واللي اعتبرها البعض أخطاء، سواء في لغة المصرين في زمن الإمام الشافعي أو الأحداث التاريخية.. وغيره، واللي بالرغم من اعتماد فريق العمل على مصادر موثوق منها، لكن بيبقى جزء درامي من خيال المؤلف، والجميل في المسلسل إنه خلي الناس ترجع تقرأ التاريخ من تاني.

2- فكرة برنامج رامز جلال 

مقلب "رامز نيفر إند" السنة دي كان أقل من سقف توقعات عدد كبير من جمهوره، لدرجة أنهم ماكنوش فاهمين المقلب أصلًا، ومحسوش بأي خدعة خلال تقديمه، بجانب اعتقاد البعض إن الضيوف بيمثلوا إنهم مش عارفين وكده.

3- الإعلانات وأماكن تصويرها ورسالتها للجمهور 

لو ركزت في كلمات وفكرة إعلانات رمضان السنة دي، هتلاقيها بتلعب على فكرة الصبر والتفاؤل باللي جاي ولمة العيلة والصحاب وحلاوتها، وكأن صناعها اتفقوا يوجهوا رسالة إيجابية  واحدة للمشاهدين، عندنا كمان الإعلانات شغلت السوشيل ميديا من أول يوم، زي إعلان محمد صلاح وزوجته، واللي ناس كتير اختلفت على كلماته وشوفوا فيها نوع من الجميل اللي مش مفهوم من زوجته ليه،  خاصة إنه كان في بداية حياته بسيط ماديًا.

كمان إعلان العسيلي وحمزة نمرة اتعرض للانتقادات، بعد ما انتشر إنه متصور على جبل "موسى"، فالناس عضبت لإنه مكان مقدس ماينفعش يكون عليه رقص وغناء، بس مخرج الإعلان أكد إنه اتصورفي دهب أصلًا، وصدقت على كلامه متابعة، قالت إنه اتصور على جبل الطويلات قدام بيتها في دهب فعلًا.

4- انتقاد أداء "مربوحة" الضحك مش بالعافية

عكس الترحيب الكبير اللي نالته من الجميع في ظهورها الأول مع "الكبير أوي 6" السنة اللي فاتت، السنة دي مربوحة تعرضت لهجوم قوي، وعدد كبير من المتابعين شافوا إن أدائها مفتعل وبتحاول تضحك الناس بالعافية، ده بجانب إن صريخها سبب توتر للبعض، وألوان لبسها كانت مزعجة، لكن على الجانب عدد من الفنانين قاموا بدعمها.

5- خناقة محمد سعد في لوكيشن "الحاج إكس لانس"

اتسرب مقطع فيديو مسموع فيه صوت الفنان محمد سعد "لم يتم التأكد من صوته بشكل رسمي"، وهو منفعل على فريق عمل مسلسله "الحاج إكس لانس"، وكان بيقول: "إيه ده.. ده أنتو أوفر.. ده أنتو فشله... اللي مش عجبه كلمة يقول.. في حد مش عجبوا حاجه"، الأمر اللي أغضب جمهوره من طريقه تعامله مع طاقم الانتاج. "الفيديو موجود هنا".