في ساعة صفا كده، وأنت بتـ "فلتر" الحسابات اللي كنت بتابعها على إنستجرام، ضروري تضيف مكانها ناس هتفيدك، في المقال ده هنكلمكم على 5 شخصيات مالهومش علاقة ببعض، بس المشترك بينهم، إنك هتطلع من عندهم متعلم حاجة.
يالا نعرفهم:
شفيقة شامل
واحة السلام النفسي، مش هتلاقي عند "شفشق" غير الضحك وراحة البال، ما بيفرقش معاها أي حاجة بره محيط أوضتها، بين السطور كده بتقول نصايح للمتابعين من غير ما تقصد، عندها فقرة "جيفت ولا ماجفتش" حاجة زي "ريفيوز" لمنتجات مختلفة، وبرضه بتعمل بازار كل كام شهر كده، أما بقى كلابها "دوكش وشبوكش" فا دول قصة تانية لوحدهم، بالمناسبة هي بتحضر حاجه لرمضان.
تقدروا تتابعوها من هنا.
مصطفى ترك
لو مخنوق وعايز تفك شوية، مصطفى هيفصلك عن العالم، أوقات بيتقمص شخصيات ماتخطرش على بالك، بس أحلى شخصية فيهم، هي الأم المصرية الأصيلة، ودي شبه أمهاتنا كلنا، بريأكشانتها وكلامها في تجمعات العيلة.
تقدروا تتابعوه من هنا.
نسمة خضر
شبه بنات كتير حوالينا، بتنصح البنات من واقع خبرتها وتجربتها، وبتقدم برضه ريفيوز لمنتجات وملابس، ودلوقتي بتسافر أماكن مختلفة وبتعيشنا معاها، كل ده بطريقة بسيطة ورايقة.
تقدروا تتابعوها من هنا.
إسراء عثمان
خبيرة علاقات شخصية وعاطفية، بتقدم فقرة "أسك" بترد فيها على أسئلة المتابعين، والحقيقة بتقول كلام موزون ونصائح من القلب، تفيد أي بنت أو ست في علاقة أو خارجة من العلاقة، وممكن تحجزوا عندها جلسات كمان.
تقدروا تتابعوها من هنا.
ألاء العباسي
في حتة تانية لوحدها فعلًا، مهتمة بطريقة مش تقليدية للعناية بالوجه وهي "اليوجا"، بتنزل كل كام يوم "ريل" بيحتوي على "مساج" بحركات معينة لفرد البشرة، أو لعلاج الشعر.
تقدروا تتابعوها من هنا.
