لسه المنافسة شغالة بين المسلسلات الرمضانية، الحكايات وصلت لذروتها، والأبطال أدائهم بيعلى مشهد ورا التاني، ووسط العدد الكبير ده من الأعمال، تصدرت مسلسلات بعينها تريند جوجل من بداية السباق الرمضاني 2023، والجمهور بيحث عنها وبيشوفها أكتر من مرة.

يالا نعرفهم:

جعفر العمدة

تقريبًا كده مفيش قهوة ولا بيت مابيتفرجوش على "جعفر العمدة" على الفطار، الأحداث تشد والقصص تشبه قصص واقعية كتير، فالكل مستمتع ومتشوق للنهاية، بطولة محمد رمضان، هالة صدقي، مي كساب، ونجوم أكتر.

ضرب نار

الثنائي أحمد العوضي وياسمين عبد العزيز، قدموا مشاهد قوية في مسلسل "ضرب نار"، خاصة المشاهد اللي بيظهر فيها حب وغيرة جابر الكومندا ومهرة، بيشاركهم في المسلسل النجمة الكبيرة سهير المرشدي، انتصار، بدرية طلبة، إيمان السيد، أحمد غزي.

"المداح : أسطورة العشق"

رغم إن الجمهور بقى عارف الفكرة الأساسية من مسلسل "المداح"، لكن أحداثه خطفتهم، للسنة الثالثة على التوالي بيكمل حمادة هلال أحداثه الجزئين الأول والثاني، بقصص وحكايات ومفاجأت مختلفة، بيشاركه البطولة، هبة مجدي، دنيا عبدالعزيز، تأليف "أمين جمال، وليد أبوالمجد، شريف يسري"، وإخراج أحمد سمير فرج

الأجهر

الديكور، الموسيقى التصويرية، ولذاذة إفيهات عمرو سعد في التاتش الشعبي، توليفة هايلة لنجاح المسلسل، بيشارك في البطولة عدد من الفنانين منهم، سيد رجب، درة، ناهد السباعي، مصطفى أبوسريع ، سارة سلامة، عمرو عبدالجليل، عارفة عبدالرسول، نور النبوي، من تأليف ورشة ملوك، وإخراج ياسر سامي.

تحت الوصاية

بدأ عرض في النصف التاني من رمضان، ضمن دفعة جديدة من المسلسلات، لكنه قدر يثبت نفسه، ويأثر في المجتمع بشكل مباشر، وينور على قضية أو قانون الوصاية وبنوده بعد وفاة الأب، بطولة منى زكي، أحمد خالد صالح، نسرين أمين، من تأليف خالد وشيرين دياب، وإخراج محمد شاكر خضير.