بحر السوشيال ميديا مليان، والشاطر هو اللي يعرف يدوس على زرار الـ فولو أمتى وأمتى يديها أنفولو، ما هو أهلنا معلموناش بلاش علشان نسلم عقولنا ونبيع وقتنا لأي حد عنده قناة أو حتى حساب موثق بعلامة زرقاء وكده.
وبما إننا في "كلام القاهرة" عودناكم كل فترة نرشحلكم مشاهير محتواهم مفيد بجد مش كلام وخلاص، فا إحنا بقالنا فترة بنتابع حسابات 6 بنات على "إنستجرام" يستحقوا متابعتكم.
ماري حداد
لو عايز تعرف سوق التسويق الإلكتروني ماشي إزاي؟ يبقى عليك وعلى ماري، هتعلمك إزاي تهندل الكلاينت! وإزاي تعمل فلوس من البيت؟ وإزاي تبقى غني كمان؟ وهتحس وأنت بتقلب في فيديوهاتها إن جواك طاقة وشغف كبير بس محتاج اللي يوجهك، وهي بتقوم بده بذكاء واحترافية.
تقدروا تتابعوها من هنا.
يمنى باسم
توهت واحتارت في صفحات اللايف كوتشينج، وأوقات تسمع المعلومة وعكسها في نفس الموضوع، يمنى عندها خيوط ماسكة بيها أطراف معظم أنواع العلاقات تقريبًا، حب، غيرة، حتى خناقة العيد والمناسبات هتقولك تتعامل معاها إزاي بحكمة ومنطق.
تقدروا تتابعوها من هنا.
إيمان جمال
هتعرف فوائد عن أكلات مكنتش تتخيلها، وهتجرب معاها وصفات صحية هتفرق معاك جدًا، لفة عندها هتتعرف على جسمك واحتياجاته ببساطة ومن غير فزلكة.
تقدروا تتابعوها من هنا.
فرح الكردي
بمايك صغير وستايل شعرها المميز مش بس هتخطف عينك، كمان عقلك هيتسحل معاها في قصص وحكايات عجيبة ومربية بتحصل في العالم حوالينا، هتعرفك على دولة كل المواصلات فيها ببلاش، وهتحيلك حكاية الراجل الغامض اللي ورا "شي إن".
تقدروا تتابعوها من هنا.
هنا زهير
أول بأول هتكتشف معاها الجديد في إدارة السوشيال ميديا، يعني لو عندك براند ونفذت كلامها هتضمن محتواك يتطور ومتابعينك يزيدوا، وهتمشي معاك خطوة بخطوة علشان تكون أنت نفسك براند متشاف على مواقع التواصل.
تقدروا تتابعوها من هنا.
تغريد الصبان
مش بس معدة برامج ناجحة في ماسيرو، كمان مدربة إيروبكس نشيطة، تغريد بتشجع الكل على حياة جسدية ونفسية صحية، ضحتكها تملاك طاقة وسلام، وتفاصيلها تخليك عايز تقوم تتمرن حالًا.
تقدروا تتابعوها من هنا.
